01 May 2024: Lai Autonomous District Council (LADC)-a thla 3 dawn sawrkar a kal mumal theih loh hnu, thla 2½ chhung LADC chu Mizoram Governor-in enkawl lailawk tura a ruat Lawngtlai DC-in a enkawl hnu-ah vawiin khan Congress MDC 1 leh MNF MDC 12 te’n an din United Legislature Party chuan Congress Member, Lungpher South bialtu MDC Pu C.Lalmuanthanga hovin sawrkarna an siam theih thu Larsap hnenah Lawngtlai DC Pu Cheemala Siva Gopal Reddy kaltlangin an thlen.
LADC-ah MNF Legislature Party sawrkar, Pu V.Zirsanga kaihhruai chuan thlawptu a ngah tawk lo tih a hnu deuha Lairam Democratic Alliance invuah MDC 13 te’n Governor hnenah an thlen hnuah March ni 7, 2024 khan Larsap chuan LADC-ah CEM nilaiin thlawptu a neih dan fiah turin Floor Test nei turin a ti a. Hetih lai hian hemi nî vekah hian LADC Session \an hma deuhvin CEM nilai Pu V.Zirsanga chuan CEM a\anga banna a thehlut a. Hemi hnu hian LADC-ah sawrkarna siam thei an awm mai loh vangin Governor chuan LADC thuneihna laksakin, enkawl lailawk turin Lawngtlai DC chu March ni 15, 2024 khan a ruat a. Caretaker [Lawngtlai DC]-in thla 2½ a enkawl hnuah nimin chawhma lam khan Congress MDC 1 leh MNF MDC 12 te chuan LADC-ah INC Member Pu C.Lalmuanthanga kaihhruaina hnuaiah sawrkarna an siam theih thu hi Larsap hnenah Caretaker kaltlangin an thlen a ni.
Caretaker [Lawngtlai DC] chuan an thu thlen chu Governor hnenah a lo thlen nghal tur thu a lo hrilh a. Hemi hnu hian United Legislature Party te chuan LADC Chairman Pu VL.Hmuaka hmuin, sawrkarna an siam theih thu hi an thehlut bawk a ni.
United Legialature Party te hi Lawngtlai West MLA Pu C.Ngunlianchunga leh State Sawrkar hmasaa Deputy Speaker Pu H.Biakzaua te’n tawiawmin, LADC-ah sawrkar piang mai theilo chu ram mipuite’n an tawrh nasat vangin Congress leh MNF te chuan mipui tawrhna thleng zel tur ngaingam lovin sawrkar siam dun an remti tih Lawngtlai-a Akashvani palai an hrilh a ni. (AIR)
