Lalremsiami leh Lalthantluangi-te hmuah leh Lawmna

Asian Games 2026 zawh taka Mizoram aṭanga gold medalist pahnih – hockey player Lalremsiami leh Lalthantluangi-te hmuah dan tur Inrinni khan Pu Lalnghinglova Hmar, Minister of State (i/c), Sports & Youth Services Department hovin a office-ah sawrkar hotute leh sports association aiawhte’n an rel.

Lalremsiami leh Lalthantluangi te telna India hmeichhe hockey team chuan Asian Games 2026 final-ah China hnehin an champion a, Lalremsiami hian final-a goal awmchhun leh champion-na goal mawi tak a thun nghe nghe. Ruahman ang chuan October 5, 2026 (Thawhtanni)-ah Lengpui airport an lo thleng dawn a, airport-a lo hmuah bakah a lawmna pui ber chu Chief Minister Pu Lalduhoma hovin R. Dengṭhuama Hall, Mualpui Salem Vengah October 5 chawhnu dar 3:00 aṭangin neih tura rel a ni. Lawmna programme-ah hian a duh apiang tel turin Sawrkar chuan a sawm a, kal turte chu chawhnu dar 2:30 ah R. Dengṭhuama Hall-a thlen hman tur a ni ang. 

Sports Minister Pu Lalnghinglova Hmar chuan, “Lalremsiami leh Lalthantluangi te hi Mizo zinga Asian Games-a gold medal mai ni lo, medal hrim hrim la hmasaber an nih avangin thil hlu bik a ni a, Sawrkar pawhin a ngaihlu a, ropui taka lo hmuaha lawmpui a duh. An champion piah lamah Olympic 2028 khel tura an tlin nghal avangin a hlu lehzual a ni” a ti a. Sports Incentive Cash Award Scheme hnuaiah cheng nuai 25 ve ve an dawn tur thu a sawi bawk.

Meeting chuan Lalremsiami leh Lalthantluangi ṭhiandun hi Lengpui airport-ah Deputy Speaker Pu Lalfamkima hovin sawrkar leh sports association, Mizoram Olympic Association (MOA), United Sports Association of Mizoram (USAM) leh Hockey Mizoram aiawhte’n lo hmuah nise tiin a rel.

Asian Games gold medalist leh anmahni hmuaktute chu Lengpui airport aṭangin chawhnu dar 1:30 vela rawn chhuakin, Hunthar peng aṭangin Chanmari lamah an kual chho ang a, Treasury Square aṭanga Republic Veng leh ITI veng kaltlangin R. Dengṭhuama Hall an pan dawn a ni. Hemi paltlang kawng dunga mipui awmte chu an awmhmun ṭheuhah Lalremsiami leh Lalthantluangi te lawmna lo lantir turin ngen an ni.