Lamlian dung zauva dragon fruit thar te leisak turin Local Soda Pvt. Ltd te nen inremna ziak
27 Jan 2024: Vawiin khan Chief Minister Pu Lalduhoma chuan Thenzawl ram, Lamlian dung zauva Dragon Fruits chingtu pawl, Thenzawl Dragon Fruits Growers & Marketing Society te General Assembly vawi 3 na, an zau chhung Gaby’s Farm-a buatsaih chu khuallian niin a hmanpui.
He hunah hian Chief Minister chuan, he Lamlian dung zauvah hian sawrkar sum leh huan neitute sum tam tak senral a ni tawh a, hmalakna zau tak kalpui mek a ni a, mi tam takin tam tham takin dragon fruits in thar mek bawk a. A puitlin ngei hi a tul a, a puitlin theih nana in mamawh ber chu a panna kawng tha hi a ni. Chuvang chuan a panna kawng en hi vawiina ka lo kal chhan a ni. Sialsuk dai emaw a remchanna hmun atanga he in huan hmun panna tur kawngpui siam nan hian Rs. 31.84 crore kan dah hrang tawh a, kawng grade tha tak siam turin hma kan la dawn a ni, a ti. He sum hian black topping na nen vek chuan a daih rih lo mai thei a, kawng zal tha zawk zawn chhuah te a tul dawn avangin. Amaherawh chu contractor ten dik taka an hman phawt chuan tluang taka hman theiha laihna tur chu a daih kan ring a ni, a ti. An mamawh tuilakna tur pawh hun remchangah sawrkarin a la ngaihtuahsak tur thu a hrilh bawk. A thlai tharte leisaktu tur Local Soda Pvt. Ltd te nena thawhhona an lo siam te chu thil lawmawm tak a tling a ni, a ti. Local Soda te hian kuthnathawktute thlai tharchhuah an leisaka, an process a, hma an sawn zel dawn phawt chuan Hand Holding Policy hnuaiah kan thawk dun theiin a rinawm a ni, a ti bawk. Tun hnaiah Mizo thalai fing leh thiam tak tak, entrerenuer tha an rawn pung chho zel tih tarlangin, heng thalaite hi sawrkar chuan an banah kaiin kan hnuk dawr dawr dawn a ni, a ti. Chief Minister hian, hmasawnna hna engkimah kan sawrkar chuan a dawngtu beneficiary tur thlanah duhsak zawng a nei lova, mi hlawhtling ngei turte a zawng zawk a ni.
Nangni pawh eng party pawh lo ni ula kan thliar lo che u, mahse in huan hi lo tipuitling rawh u, tiin a chah a ni. Lamlian dung zauvah ah hian kum 2021 atang khan chhungkaw 50 ten ram hectare 82.79 a zauvah dragon fruit hmun an siam a. Sawrkarin MIDH, FOCUS leh tanpuina awm thei dangte in unit 129 siamna an pe a, drip irrigation system an pe bawk. Unit 1 hi ban 200 zel a ni. Sawrkarin a tanpuina leh an mimal hmalakna te nena belhkhawmin tunah hian unit 150 an nei tawh a, a vaiin kung 30000 vel neiah an inngai a ni. Ban khatah hian kumtin kg 30 vel a rah thei niin an sawi a, an dragon fruit te a puitlin vek hunah chuan kumtin Rs. Nuai 300 man vel an thar thei turah an inngai a ni. An dragon fruit thar te leisak turin kum thum chhung atan Local Soda Pvt. Ltd te nen inremna an ziak a, kumin atangin an tharchhuah ang ang te Farm gate-ah kg khat Rs. 150 zelin an leisak dawn a, a seng hna pawh an thawk nghal vek dawn a ni.
