16 Dec 2024: Vawiin chawhma dar 11:00 khan Mizoram Governor Dr.Hari Babu Kambhampati chuan Mizoram Youth Commission (MYC) Chairman Pu Malsawmzuala Ralte chu Raj Bhavan-ah kawmin MYC hmalakna hrang hrangte leh hmachhawpte a sawipui.
Governor chuan India ram hmun hrang hranga hnathawh tur remchang tam tak awmte Mizo thalaite’n an hmuh theih nana chak zawka hmalak a tul thu sawiin, zirna sang zawk bel lo, thingtlang kilkhawr zawka awmte thlengin an kumin a phak phawt chuan hna an hmuh theih nana puih a tul thu a sawi a. Qualification leh an tuina azir zela thalai hna zawngte register-a data mumal tak neih fel hmasak a tul thu leh, hna a awm veleha an zawm theih nana lo inhmakhua lawk a tul thu a sawi a. Governor chuan Mizo thalaite chu mahni awm hmun chhuahsan hreh lo tur leh hmun danga hna zawnga chhuah tum turin a fuih a. Hmalaknate zau zawka puanzar a tul thu sawiin, MYC hotute chu Mizo thalaite’n hna tam zawk an hmuh theih nana theihtawp chhuah turin a chah a, puih a tul huna pui tura a inhuam reng thu a hrilh a ni.
He hunah hian MYC Chairman Pu Malsawmzuala Ralte chuan financial year 2024-2025 kal meka an hmalaknate Governor hi hrilhin thalai 43 te’n MYC kaltlanga hna an hmuh thu a sawi a. Thalaite hmakhua ngaia Govenor-in State danga hnathawh tur a ngaihtuah sak thin leh tunhnaiah Governor hmalaknaa Sri City, Andra Pradesh-ah Mizo thalai 8 te’n hna thar a hmuh avangin lawmthu a sawi a; MYC hmalaknate a ngaihven reng thin avangin lawmthu a hrilh a ni.
This website uses cookies to improve your web experience.