03 Sept 2025: Mizoram Larsap General Vijay Kumar Singh chuan vawiin chawhma khan Ministry of Home Affairs (MHA) hmalakna hnuaia Border Security Force (BSF) ruahman, Bharat Darshan Tour hmanga Delhi kal tur zirlai naupang 100, zirtirtu 8 leh tour guide-te chu Raj Bhavan atangin a vai liam.
Larsap chuan Sawrkar laipui, Ministry of Home Affairs leh BSF te hmalakna hnuaia Mizoram naupang 100 leh zirtirtu 8 te tan Bharat Darshan Tour buatsaih a ni chu lawmawm a tih thu a sawi a. Bharat Darshan Tour-a kal tur zirlaite chu zirlaibu a chuang chiah lo thil tam tak an zir tel dawn avangin uluk taka ngaihvena thil thar zir chhuah tum tlat tur leh, Mizoram tana hmasawn thil tha engemaw tal rawn hawn theuh tum turin a chah a. Zawhna leh hriat duh an neihte inthlahrung hauh lova zawt zel tur leh hmasawn nana hman tuma theihtawp chhuah turin a chah a ni.
Hemi puala hun tawi hmanah hian Pu Ahsan Sahedi, DIG (G), Frontier HQ BSF, Silchar chuan report tlangpui pein, Ramri depa awmte tan Bharat Darshan Tour buatsaih thin a nih thu sawiin, hemi tur hian Ministry of Home Affairs-in BSF te chu kumin hian Mizoram zirlaite tana Bharat Darshan Tour buatsaih tura a rawn ruat thu leh hei hi BSF anga Mizorama Bharat Darshan Tour an buatsaih hmasak ber a nih thu a sawi.
Tun tum Bharat Darshan Tour atan hian District pali- Aizawl, Lunglei, Mamit leh Saitual District-a School 8 a zirlai 100 leh zirtirtu 8 te thlan chhuah an ni a. Ni 6 chhung September 3-8, 2025 thleng awh tur niin, Delhi-a History hmunhma pawimawh tak takte, cultural & heritage site-te, Sawrkar office leh Museum-te an tlawh dawn bakah MHA official-te nen inkawmhona hun an hmang dawn a. Zirlaibu a chuang mai piah lamah thil pawimawh hrang hrang- India ram chanchin, hmunhma pawimawh, hmasawnna, khawtlang leh hnam ziarang hrang hrangte leh Sawrkar inrelbawlnate Bharat Darshan Tour kaltlang hian zirtir tum an ni. (DIPR)
