LDTDA-in Weigh bridge-ah thil fel tawklo a awm niin an hria

20 May 2026: Lunglei District Truck Driver Association (LDTDA)chuan Buhfai phurh chungchanga an harsatna tawh dan vawiinah MJA Lunglei member-te an enpui.

LDTDA hian FCI Godown Lunglei Luangmual atanga buhfai an phurh chhuah thin chu a bulhnai lawka awm Supply Godown (PDC) a an dahluh dawnin a buk a tling lo zel niin an sawi a, hetiang anih avang hian driver-te’n a tlinlohna hi pawisa an chawi thin tih an sawi.

LDTDA hruaitute sawi danin, FCI godown-ah hian Weigh Bridge-ah an motor ruak an buk hmasak hnuah buhfai an phurh hnuin buk sak leh an ni thin a, FCI godown atanga a bul lawk PDC godown a an dah dawn hian Weigh Bridge-ah bawk buk sak leh nii; hetah hian FCI godown a an bukna ang quintal zat chu Kg 60 velin a tling lo zel tih an sawi. Hetiang anih avang hian driver-te’n a tlin lohna chu an chawi zel tih an sawi.

FCI Godown atanga Lunglei Dist hmun danga buhfai dah tur an phurh chhuah pawhin an dahna tur hmuna an lo buk sakin Kg 70 te in a tling lo thin a, chu chu driver-te’n an mahni sumin an dahkhah zel angai thin chu an tan phurrit anih thu an sawi.

Supply godown (PDC) atanga hmun danga dah tura an phurh chhuah thin erawh an dahna tur hmun a an lo buk sak lehin a dik thlap zel tih LDTDA hruaitute hian an sawi a, hetianga harsatna hun rei tak an tawh tawh lai hian Sairang atanga FCI godown Lungleia dah tur buhfai phurtute buhfai phurh erawh FCI Godown Lungleia lo buk sak leh an nih hian Sairanga an buk aiin a rit leh si thin chu mak an tih thu leh FCI godown Lungleia Weight Bridge chu thil fel tawklo awm ni bera an hriat thu an sawi.

Heng an harsatna hi thuneitu hrang hrang bakah Minister thleng pawhin an lo thlen tawh thu an sawi bawk.

Vawiina MJA member-te’n a hmun ngeia an enpui hian Truck Driver Association te harsatna sawi hi a dik ngei tih sawiin, thuneitu lam ten hemi chungchangah hian thil diklo awm ngei nia lang hi ngaihven thuai se tha an tih thu an sawi.