Leitlangpui Band Contest a pakhatna, Knot (Aizawl)

15 Nov 2025: Nizan khan Lunglei Pukpui Kawmzawla Leitlangpui Music Festival (LMF) 2025-ah Leitlangpui Band Contest inelna final round buatsaih niin, Knot (Aizawl, Mizoram) chu pakhatna an ni.

Leitlangpui Band Contest 2025-ah hian band 29 inziak lutin, Mizoram pawn aṭangin band pariat (28%) an tel. Hei hi Mizoram rimawi chanchina mellung thar, ram pawn aṭanga band tel tam ber (record) a ni.

He Contest-a band telte’n an zai video an theh luh chu endiktute’n lo endikin, Top 12 band an thlang chhuak a. Top 12-ah hian Mizoram aṭangin band 7 (Abstract Analogy; Knot; QR Code; Revenge of Ancestor; Take 5; Terat; Zo Par), Assam aṭangin band 2 (Ambush; Maestro), Meghalaya aṭangin band 2 (Bending Waves; Strange Origin) leh Nagaland aṭangin band 1 (Nova District) an lang a. Top 12 aṭang hian LMF ni 2 ni, November ni 14, 2025 (Zirtawpni) zan khan Kut hmanna hmun, Kawmzawl (Pukpui, Lunglei)-ah band pasarih chu final round-ah inlanin, live-in an inel a. Knot (Aizawl, Mizoram) chu thiam bera thlan niin, pahnihna Terat (Aizawl, Mizoram) leh pathumna Abstract Analogy (Lunglei, Mizoram) te an ni.

Lunglei Band Contest 2025-a pakhatna hian Rs nuai 3 an dawng a, Pahnihnain Rs nuai 1 dawngin, pathumnain Rs 50,000 an dawng thung.

Leitlangpui Band Contest 2025-ah hian mimal lawmman heti ang hian sem a ni bawk:

Best Vocalist – Daniel (Terat)

Best Guitarist – James (Abstract Analogy)

Best Drummer – Samuel (Knot)

Best Bassist – Jitu (Ambush) Best Keyboardist – George (Knot)