Leitlangpui Music Festival 2026 hlawhtling taka hman a ni

14 Nov 2026: Ministry of Tourism, Government of India leh Tourism Department, Government of Mizoram ṭang kawpin rimawi kûtpui, Leitlangpui Music Festival (LMF) 2026 an huaihawt chu November ni 11–13, 2026 chhung khan Lena Stadium, Serkawn, Lungleiah a ṭum thum nan hlawhtling taka hman niin, nizan khan a hmawr bawk fel a ni.

Tourism Minister Pu Lalnghinglova Hmar chuan Leitlangpui Music Festival hlawhtlinzia a taka a hmu chu lawmawm a tih thu sawiin, a hlawhtlin theih nana thawk rim tak tak zingah Lunglei High Powered Committee (HPC) Vice Chairman Pu V. Malsawmtluanga te, Lunglei Municipal Council (LMC) Ward No. II Councillor Pi Lalmuanpuii Renthlei leh a thawhpuite, Serkawn khawtlang hruaitute, Lungleia sawrkar department hrang hrang leh Lunglei mipuite zara LMF hlung tak neih a ni leh ta chu lawmawm a tih thu a sawi a. LMF-a dawr hrang hrangte chu mipuiin an hlutin, sum leh pai pawh ṭhahnem tak a vir vel ang tih a rin theih thu sawiin, chu chu tourism tum lian tak a nih thu a sawi a. Khualkhua leh hmun hla zawk aṭanga mikhual hip bakah, tualchhung mite mahni leh mahni tourist kan ni thei tiin, Mizovin Mizoram kan ngaihsan a, Mizo hmun mawi leh nuam te kan intlawh pawh tawn chuan, sum leh pai lo ṭhangin, economy-in a ṭhat phah ang tih an sawi fo chu a taka a lo lan zel thu leh a ṭhan chhoh zel pawh a beiseiawm thu a sawi.

Tourism Minister chuan Mizoramah khualzin an pung chho zel tih sawiin, kum 2025 chhungin Mizoram tlawhtu khualzin 8,41,322 an awm thu leh chu’ng zinga 1,33,520 chu December thlaa Mizoram tlawhtu an nih thu a sawi a. Kumin 2026 hian September thlengin Mizoram tlawhtu khualzin 7,37,626 an awm tawh thu leh a vanglai, October–December chhiar hunah chuan Mizoram mipui zat vel khualzin an awm tura chhut a nih thu sawiin, tihpun zel tumin theih tawp an chhuah tih a sawi a. Chumi atan chuan LMF te, Tourism Department-in event hrang hrang a buatsaih leh khawtlang ṭang rualin mahni puala community-based event hrang hrang an lo buatsaihte chu a ṭangkai hle tih a sawi.

Minister Pu Lalnghinglova Hmar chuan hlaah, “Leitlangpui a chul dawn lo,” tih a nih angin, LMF pawh a chul dawn lo tiin, anni an awm a, sawrkarna vawn fung an chelh chhung chuan LMF chu an chhunzawm zel tur thu a sawi.

Leitlangpui Music Festival 2026 tawp zanah hian Lunglei High Powered Committee (HPC) Vice Chairman Pu V. Malsawmtluanga bakah, LMC Councillor-te leh sawrkar official eng emaw zat telin, mipui ṭhahnem takin Festival hi an chhim a. Rnzx, Dingtea Guite, Saka, Serkawn Band, Rokhumbeu, Johan H. Lalmalsawma, Your Sweetest Memories, Ruatpuii leh Triau Trackx te’n zai leh rimawiin Kut chhimtute an awi.

Leitlangpui Music Festival 2026-ah hian event management agency (EMA), BBY Animals te’n Kut huaihawt hi buaipuiin, zaithiam hrang hrangte nen rimawi kûtpui hun hman a nih bakah, rimawi rem leh zai intihsiakna (Band Contest) buatsaih a ni a. Kut chhimtute tan ei leh in, hnam thuam, kut themthiam thil leh bungraw chi hrang hrang zawrhna stall te, intihhlimna hmun leh dan lam inzirtirna hmun te ruahman niin, stall hrang hrang 100 vel hawn a ni a. Kut hi mipuiin an hlutin, chhimtu pawh an ṭhahnem thei hle.