04 April 2024: Lunglei SP thar Pu J.Lalmuankima chuan vawiin khan a pisa-ah Lunglei-a thuthar thehdarhtute kawmin, an hmalakna leh hmachhawp hrang hrang a sawipui.
Pu J.Lalmuankima chuan ruihhlo dona kawngah chanchinbumite chu thawhpui-ah a sawm a; ruihhlo lo ti tawhte chu simtir a har thu sawiin, a la ti ve lo te’n an tih ve lohna tura theihtawp chhuaha mithiamte nen tangkawpa hma lak an tum thu a sawi.
Lunglei SP chuan lirthei khalh chungchangah dan bawhchhia hremna tihdanglam an tum thu sawi bawkin, a nazawnga pawisa inchawitir chu an tum tawh lo, a ti a; dàn bawhchhetu chu a dàn bawhchhiat dan leh a hriat tur chungchang ziak sazai pek bakah vawn tira a tih dikloh lai chiang taka a hriatfiah hnuah kal tir mai tura ruahmanna an siam tawh thu a sawi a. Hemi piah lamah sum chawi ngei ngei ngai chi dàn bawhchhia chu chawitir an nih tho tur thu a sawi.
Cyber Crime chungchang sawi bawkin mipuite fimkhur a tul thu puanzar a nih theih nan Lunglei District MJA-te nen remchangah awareness campaign neihho ni se a ti bawk a. Tun dinhmunah Lunglei District chhungah Police post 316 awmah mi 186 thawktu an awm mek a ni.
