02 May 2025: Vawiin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin BoC Meeting Hall, Convention Centre, Lungleiah an thukhawm.
LMC BoC thutkhawmah hian Finance changtu Executive Councillor Pu Zorinsanga Hmar chuan kum 2025-2026 atana LMC sum hmuh dan tur leh sum hman dan tur ruahmanna, budget chu pharhin, sawiho anih hnuah lungrual taka pawm a ni a. LMC Budget 2025-2026 atan hian Rs 24,63,97,208/- ruahman a ni a. Tax and Non-Tax Revenue atangin Rs 20,86,73,000/- leh Capital Receipts-ah Rs 3,77,24,208/- hmuh beisei a ni.
State sawrkarin LMC chu property tax 2024 -2025 khawn phalna a pek tawh angin inbuatsaih mek a nih thu tarlan niin, property tax khawn chu mipui hnenah a luang let tih mipuiin an hriat chian theih nan talkshow leh thil dang hmangin mipui zirtir ni se, tih a ni a. Property Tax khawn dan tur inkaihhruaina siam rem nghal niin, Ward Committee kal tlangin Ward Development-ah 80%, Local Council kal tlanga hmasawnna hna thawh nan 15% leh LMC-ah 5% kal tura siam rem a ni.
Nikum chhung khan parking fee atangin Rs18,31,349/- khawn chhuah a nih thu tarlan niin, LMC BoC thukhawm chuan hei hi a bo a bang awm lova mipui tana hman ni se tiin, Lunglei khawpui chhung traffic marking leh mamawh bakah kawngpui siamna atan hman ni se, an ti.
LMC Board of Councillors thutkhawmah hian elected councillor sawm leh pakhat (11) an tel kim a. LMC Chief Executive Officer Pu Donny Lalruatsanga leh Secretary Pi Zoramdini te’n an telpui bawk a ni.
