13 Aug 2025: Vawiin khan Lunglei Municipal Council (LMC) leh Mizoram sawrkara Directorate of Economics & Statistics ṭang kawpa LMC huam chhunga chhiarpui (demographic census) buatsaih tura a chhiartu (enumerator) turte tan Lunglei Convention Centre-a BoC Meeting Hall-ah thil pawimawh hrang hrang zir hona, training buatsaih a ni.
LMC Chairman Pu Lalzuithanga’n training hi hawngin, LMC-in Lunglei khawpui leh a mi chengte tana hma a laknaah dik leh felfai taka hma lak a nih theih nan inchhiarna (data) dik leh rin tlak tak a awm a ṭul tih a sawi a. Chhiarpui zawh hnuah chuan data dik tak nen LMC pawhin hma a lak chhoh theih a beisei thu a sawi.
LMC Chief Executive Officer Pu Donny Lalruatsanga’n hun kaihruaiin, chhiarpui buatsaih tura inpuahchahna leh hun bi ruahman dan a sawi fiah a ni.
Economics & Statistics Deputy Director Pu H. Lalnunzuala chuan Mizoramah a tlangpuiin kum tin nau piang mipa 51% aia tam lo leh hmeichhia 49% aia tlem lo an ni ṭhin tih sawiin, kum 2022-ah mitthi zinga 64.73%, 2023-ah 65.03% leh 2024-ah 65.1% chu mipa an ni thung tih a sawi a. Hmeichhia leh mipa inchawih tawk tura chung lamin a duan sa chu ruihhlo vangin a khawlo zo tih sawiin, hmeichhia leh mipa zat inthlauhna dik tak hre turin inchhiar chu a pawimawh tih a sawi.
LMC Demographic Census Nodal Officer, Superintendent Pi C.Lallianpuii chuan chhiarpui atana hma lakna leh ruahmanna hrang hrang a tar lang a. Directorate of Economics & Statistics aṭanga mi thiamte’n enumerator-te tana hriat tur pawimawh hrang hrang te an zirtir.
LMC Chhiarpui atan hian Lunglei Government College zirlai aṭangin enumerator tur mi 24, local council tin tan pakhat ṭheuh ruat an ni a. Ruahman lawk dan chuan, August ni 18 leh September ni 15, 2025 inkar chhungin inchhiarna kalpuiin, October ni 27, 2025-ah tlangzarh hman beisei a ni. (DIPR)
