LMC leh UD&PA Dept chhunfin remin an hre lo; ennawnsak leh turin ngen

14 Oct 2026: NGO Co-ordination Committee, Lunglei chuan thuchhuah siamin, NGO Co-ordination Committee (YMA Sub-Hgrs. Lunglei, MUP, MHIP, MZP, MSU leh Chhimbial Chhantu), Lunglei Meeting, Ni 14th October 2026-a neih chuan tun hnaia Mizoram Sawrkarin Lunglei Municipal Council leh Urban Development & Poverty Aleviation Department (UD&PA) chhun fin tumna a nei nia hriain, kan sawrkar zahawm tak hian hetianga hmalak tumna hi tihlawhtling lo se a duh tak zet a ni, an ti.

NGO Co-ordination Committee, Lunglei duh dan hi Lunglei mipui aw a ni tih min hriatsak a, min ngaih
pawimawhsak turin Mizoram Sawrkar zahawm tak hi kan ngen, an ti a, Lunglei Municipal Council (LMC) leh UD&PA Department chhun fin a rem lohna chhan nia an hriatte chu a hnuaia mí ang hian an tarlang a ní :

1 UD&PA hi Ministry of Housing and Urban Affairs Department hnuaia awm, Mizoram State Government Full
Fledge Department ani. LMC hi The Mizoram Municipalities Act 2007 leh Constitution (74h Amendment) Act 1992 tlawhchhana Local Self Government-a din a ni a. Subordinate/Local Body pakhat hian State Administrative Department hi nuai bovin, LMC-a a inchhun luh hi a remchang lovin kan hria a. LMC leh UD&PA Department te hi an Subject khawih inang a awm theih rualin, inchhun fin kher lovin tun dinhmunah chuan an la awm hrang theiin kan hria.

2 UD&PA hi LMC leh AMC tana Administrative Nodal Department pui ber a ni a. Central Sponsor Scheme leh State Grant hrang hrang enkawitu leh Technical Support petu a ni a. LMC-a a inchhun luh chuan UD&PA nihphung leh a mawhphurhna eng emaw zat hi a hloh dawnin kan hria a, Lunglei khawpui hmasawnna (Developmental Project) hrang hrangin a tawrh phah thei dawnin kan hria a ni.

3 Kan tun dinhmunah, LMC hian hmabak tam tak, a bikin sum thawh chhuah lamah te, Technical Staff leh
Ministerial Staff thlengin mamawh a la ngah hle-in kan hmu a, chutih rualin, heng kawng hrang hranga an indaih lohna te hi UD&PA Staff te hmanga hnawh khah mai hi a remchang lovin, thil kalphung ni lovin kan hria a ni.

4 UD&PA hian Census Town leh Notified Town a enkawl avangin, LMC nena chhun fin a nih hian, tuna a enkawl mek te hian an tuar phah theiin kan ring bawk a ni.

5 UD&PA hi State Sawrkar ki pawimawh tak (Executive Machinery – State Minister, lAS, State Civil Service tena an awp) niin, Municipal Council hi chu State dan hmanga din, inkhaidiatnaah pawh a chhawng thumna, tual chhung sawkar (Local elf Government Institution) a nih angin, inchhun fin hỉ a rem lovah kan ngai.

Heng Point hrang hrangte avang hian LMC leh UD&PA Department hi NGO Co-ordination Committee, Lunglei
chuan inchhun fin hi tun dinhmunah a remin an hre lo va, Mizoram Sawrkar pawh, en nawnsak leh turin an ngen tak meuh meuh tih an sawi a ni.