Lunglei chawmtu tui Pump-na line thar phum mek pakhat rih zawng Kg 370 atanga 400

26 Nov 2025: Vawiin chawhnu dar 12:30 khan Er.V.Laldanmawia E.E, PHE, LWSM Division Office Chamber-ah  Pukpui, Zotlang leh Serkawn Khawtlang hruaitute leh PHE, LWSM, hotute chuan Tlawng atanga Lunglei chawmtu tui Pump-na ‘Main line’ phum mek chungchang an sawiho.

Meeting kaihruaitu Er.V.Danmawia chuan tuna Pipe phum tur chu 355mm niin pipe pakhat rih zawng hi Kg 370 atanga 400 te anih avangin thil tih zung zung a har hle a, a phumna laih khuar zung zunga phum ngawt theih a ni lo va Welding ringawt pawh tih dan bik awmin; vawithum zel Welding nawn tur anih bawk avangin hnathawh chak a har hle a ti. Hetianga Pipe phum hna an thawh chhung hi thla thum thla li angaih dawn avangin a paltlang khawtlang Pukpui, Zotlang leh Serkawn khawtlang mipuiten min hriatthiama theihtawpa min thawhpui kan mamawh hle a ni a ti. Pipe line phum avanga mimal Connection line tih chhiat a awm anih pawhin Department lamin siamthat sak an ni ang E.E chuan a ti bawk.

Veng pathum khawtlang hruaitute chuan Pipe line awmsa leh tuna a thar phum an tumna inkar zau lutuk chu thalo an tih thu leh pipe line kalna tura an duhdan te an sawi a. An duhdan te chu lo enchian an tum thu leh an duhdan thenkhat erawh thil tih ngaihna awm lo anih thu Er.Danmawia chuan sawiin, khawtlang hruaitute chu Department mi leh sa anga inngaia theihtawp chhuahpui turin a sawm a ni.

Khawtlang hruaitute chuan Pipe phum hna thawh avanga chhungkaw thenkhat veivahna awm lo chu Department lamin ngaihtuah se an duh thu leh footpath chhe turte pawh Department lamin an siam tha leh tura an ngaih thu an sawi a, khawtlang mitmei veng takin hna thawk se an duh thu te, pipe phumna tur leivung tam tak kawng ti cheptu chu zan lamah thalai veivak an tam thin avanga chetsualna thlen theitu nia an hriat thu an sawi bakah Krismas dawn apianga Lunglei khawpuiah kawng siam leh hnathawh liantham awm ziah chu ngaihmawhawm an tih thute an sawi ve bawk a ni.

Er. Danmawia chuan mipui tana phur rit lo thei ang bera hnathawh kan tum a, Pipe welding pawh chhilh hmaa a phui em tih test zel tur anih laiin test lovin kan chhilh zel a ti.

Hetihlai hian PWD lamin Pukpui dai tawngtaina atanga AOC thleng Resurfacing an tih dawn hnaih thu leh hemi rual hian Pipe an phumna lei an laih zawng zawng chu Black top nghal tura PWD lam nen an inbiak tawh thu a sawi. PHED-te’n Lunglei chawmtu tui Pump-na line thar phum hna an thawh mek hi KM 11 chuang a thui tur anih laiin tunah hian KM 1 vel an phum tawh niin, hnathawhna tur hi SASCI atangin Rs Vbch 55, Nuai 70 hmuh anih thu Department lam hotute chuan an sawi a ni.