Vawiin (Sept ni 18, 2023) chhun khan Lunglei District Youth Congress Committee (LDYCC) chuan Circuit House Lunglei tlawhin a chhunga room hrang hrangte an enfiah.
Circuit House building hi kum 40 dawn a upa anih tawh avangin Pu Lal Thanhawla kaihhruai Congress sawrkar khan NEDP-ah Nuai 1,000 lai mai Circuit House sak that nan hian a lo dah tih LDYCC chuan an sawi a. Congress sawrkarin bul a tan hmaa sawrkarna a inthlak hnuah MNF sawrkarin Re-estimate lehin Rs Nuai 400 lai la hekin Rs Nuai 600 chiah an dah ta tiin, heti chung pawha vawiin ni thlenga hmalakna ala awmlo chu LDYCC-te chuan MNF sawrkar-in Chhimlam a hnungchhawn zia a ti lang hleah an ngai tih an sawi a.
Lunglei Circuit House room hrang hrangte chu awmna tlak pawh a ni tawh lo va, thawktuten theih tawp chhuahin an enkawl chungin, a bang leh a chung plaster-na te a tlak remrum avangin thawktute pawh an khawngaih thlak hle niin LDYCC chuan an sawi. Mizoram Sawrkar hian siamthat hna thawk thuai se an ti a, Lungleiin Circuit House tha tak a neih ngei theih nan theihtawp an chhuah zel dawn tih an sawi bawk.
