Lunglei DAO-in Oil Palm Collection Centre Cum Waiting Shed a hawng

14 Nov 2025: Vawiin chawhnu dar 1:00 khan Tlabung Zodina Oil Palm Collection Centre Cum Waiting Shed, Agrigulture Department Lunglei leh Farmer Welfare Tlabung Zodin-te’n an sak chu Pu VL.Hmangaihchhunga, District Agriculture Officer chuan a hawng.

Hawnna inkhawm tawi Pu Ngursailova, BAO Lungsen kaihhruaiah DAO Pu VL.Hmangaihchhunga chuan Zodin Oil Palm Grower Association-te’n an mamawh em em Oil Palm Collection Centre Cum Waiting Shed hawn theih a ni chu lawmawm a tih thu sawiin, hemi sak nan hian Department chuan sum a hranpa a nei lova, sum awm thei remchang ang ang dap a nih bakah mimal sumte puk chawpin sak a ni, a ti. Sak puitlin anih theih nana Loneitute thahnem ngaihna leh Oil Palm lei saktu Patanjali Company-te inpekna fakawm a tih thu a sawi.

Tlabung Zodin Oil Palm Grower Association-te thawhrimna leh inpekna avangin Patanjali Company pawhin tam tak lei tur an nei thin chu lawmawm a tih bakah Lunglei District Agriculture Department tihmingthatu pawh an nih thu DAO chuan a sawi a, nasa zawka hmasawn tuma theihtawp chhuah turin a chah a ni.

Zodin Oil Palm Grower Association hruaitu Pu Vanlalhnema pawhin thu sawiin, hetianga Oil Palm chingtute hmakhua ngaia Department lamin hma an lak sak chu lawmawm a tih thu leh an harsatna tam tak a sutkian sak dawn thu a sawi a. Oil Palm thar phurchhuah kawnga harsatna an neih dan te sawi bawkin, Department lamin a theih ang anga ngaihtuah sak an beisei thu a sawi tel bawk.

Tlabung Zodin Oil Palm Grower Association-ah hian member 60 chuang awmin, kumin bikah hian Patanjali Company hian Rs Nuai 30 man Quintal 950 chuang an hralh tawh a, tun dinhmunah Patanjali hian a hmunah Oil Palm hi Kg 1 Rs 14.40 in an lei sak a ni.

Patanjali Company aiawha thusawitu Pu Timothe-a chuan Lunglei District-ah Oil Palm kumin chhungin Rs Nuai 70 man an lei tawh tawh sawiin, nisa leh ruahsur hnuaia Oil Palm an lei thin laia a leina tur In nuam tak Department lamin an siam sak chu vanneih thlak a tih thu a sawi a ni.

Vawiin chawhnua Oil Palm Collection Centre Cum Waiting Shed Tlabung Zodin a hawnna hun tawiah hian District Agriculture Office a thawktutute bakah Tlabung Zodin Oil Palm chingtute leh Media lam te an tel a ni.