30 May 2024: Chhim lama College lian ber leh Mizoram Sorkar hnuaia College upa ber Lunglei Government College (LGC)-a zirlai, 2023-24 Core Batch Graduation Day chu Pu C.Zairemthanga, Principal, LGC uapna hnuaiah hman a ni.
Graduation Day Programme hi Multipurpose Hall, LGC-ah hman niin, session-I & II-ah ṭhen a ni. Session hmasa-ah Principal leh Vice Principal-te hnen aṭanga thuchah ngaihthlak a ni a, session hnihna chu zirlâi chhuak turte aṭanga thlahna thusawi leh intihhlimnain a zawm a, tlai lamah chawhlui ‘Graduation Dinner’ an kilho a ni.
Lunglei Government College hi kum 2017 khân NAAC accreditation B++ pek an ni a, Science Stream leh Arts stream awmin, zirlai 1250 an awm mek a; Teaching Faculties 69, Non-Teaching Staff-15, Research Project hnuaiah JRF 2 leh PhD Research scholar 1 an awm mek a ni. Lunglei Government College hi kum 1964-a din niin, chhim lama College lian ber leh Mizoram Sorkar hnuaia College upa ber a ni mek a, September 10, 2024 hian a kum 60-na “Diamond Jubillee” ropui taka lawm tum a ni.
