09 Sept 2024: Vawiin chawhma khan Pu C.Zairemthanga Principal Lunglei Gov’t College chuan a Office Chamber-ah tualchhung thuthar thehdarhtute kawmin; naktuka Lunglei Gov’t College Diamond Jubilee lawmna hunpui an hman dan tur leh an inbuatsaih dan te a sawi.
Lunglei Gov’t College Diamond Jubilee lawmna pui ber hi naktuk chawhnu dar 12:30 atangin an College Auditorium-ah lawm a ni anga, khuallianah Pi Lalrinpuii Health Minister a ni anga, Khualzahawm atan Pu T.Lalhlimpuia Lunglei West bialtu hman a ni ang. Nilenga hun hman anih dawn bakah zan lamah Jubilee Concert buatsaih a ni anga Mizorama zaithiam lar tak takte nen hun hman a ni ang. Naktuk tlai lam hian Jubilee lawmna ruai an kilhho dawn bawk a ni.
Lunglei Gov’t College-ah hian thawktuten an hriat theih chinah kum 1964 atanga 2024 thlengin BA Pass 3,201 leh BSc Pass 666; an vaiin zirlai 3,867 an pass tawh a ni.
LGC Principal chuan, Diamond Jubilee an lo thlena an thil tum Jubilee Academic Goals chu Pass Percent sang zawk ni tura tan lak, University Exam-a Gold Medalist tam zawk chher chhuah leh University Exam-a Top Ten tam zawk chher chhuah te a ni, a ti.
