Lunglei Ni hmannaah ‘Zaipawlpui’ awm turin rel

27 Jan 2026: Vawiin khan Lunglei Municipal Council (LMC) ruahmannaa ‘Lunglei Ni’ hman tur atana Organising Committee chu Convention Centre-a LMC BoC Meeting Hall-ah an ṭhukhawm a, Chairman, LMC Chief Executive Officer (CEO) Pu Lalhmansanga’n a kaihruai a ni.

Lunglei Ni 2026 hi March ni 4, 2026 (Nilaini) chhun lamah hman tum niin, a hmun atan C.Ṭhuamluaia Mual chu ruahman leh hauh fel tawh a ni.

Organising Committee ṭhutkhawmah hian Programme Committee leh Event/Activities Committee Joint meeting-in hun hman dan tur ruahmanna an duan te leh committee peng dang aṭanga thu lutte thlirho a ni a. Hnam lam entir tura sawm tur atan YMA branch & troupe 6 rawt niin, Photo Exhibition buatsaih ni se, tih a ni bawk.

Lunglei Ni hmannaah hian LMC huam chhunga YMA branch hrang hrang telna “Zaipawlpui” awm se ṭha tih niin, hla sak tur atan Pu Roliana Ralte hla phuah, “Leitlangpui Ka Vangkhua” tih chu thlan a ni.

Khuallian atan Mizoram Chief Minister sawm ni se an ti bawk.

Organising Committee ṭhutkhawmah hian Co-chairman, Lunglei Sub-Headquarters YMA President Pu K. Lalfakzuala; Secretary, Sub-Headquarters YMA Secretary Pu Zothanzuala Hnamte leh Assistant Secretary Pu H. Lalhmingthanga te bakah, member-te — sawrkar official, pawl hrang hrang ai awh leh Lungleia mi challangte an tel a ni. (DIPR)