Lunglei SP-in investigative Journalist nihte a pawimawh chho zel a ti

17 Nov 2025: Mizoram Journalist Association Lunglei chuan National Press Day November ni 16, 2025 pualin vawiin khan Lunglei Press Club-ah hun an hmang a, Pu J.Lalmuankima MPS, S.P Lunglei chu khuallian a ni.

National Press Day puala hun hman hi Pu Lianchama Chhangte Vice President, MJA Lungleiin a kaihruaia, khuallian Pu J.Lalmuankima MPS, S.P Lunglei chuan thu sawiin, Press mite chu sawrkar inrelbawlnaa hmun pawimawh luahtu; Fourth Pillar zing a mi an ni a ti a. Press mi kan nih chhung chuan kan upa emaw naupang emaw, tunlai thiamna Artificial Intelligence kan thiam angai tiin, hemi kawnga inzirna tur Lunglei Police-te’n an neih thu leh kumthar atangin MJA Lunglei member-te chu an duh anih chuan an zirtir thei dawn tih a sawi.

New Criminal Law pawh Media-te’n hriat zau a tul avangin Police lam nena zirho dan pawh ruahman tum a nih thu Pu J.Lalmuankima chuan a sawi a. Khawvel hmasawn zelah Press mite chu hmasawn turin hriam angaia, investigative Journalist nihte a pawimawh chho zel a ni a ti bawk.

Lunglei District MJA President Pu H.Lalthansanga pawhin National Press Day chu Pathianni anih avangin a ni takah hman a remchan loh laia vawiin lama Lunglei S.P hova MJA Lunglei ten an hmang thei chu lawmawm a tih thu a sawi a. Journalist-te chu khawvel changkan ang mil zela in update a tul thu a sawi bawk.

MJA Lunglei-te’n National Press Day puala hun an hmannaah hian MJA member-te bakah I & PR Office Lungleia thawktute telin, Prominent Journalist thar Pu C.S. Chawngchhuma lawmpuina an hlan a, chawhnu lamah General Meeting neih chhunzawm a ni.