Lunglei SP kaihhruaina hnuaiah Awareness Campaign for Myanmar Refugees Nghasih buatsaih
Vawiin ni 24 April, 2025 chawhma dar 11:00 khan Lunglei SP Pu J.Lalmuankima kaihhruaina hnuaiah Awareness Campaign for Myanmar Refugees Nghasih Refugee Camp-ah buatsaih a ni a. He hunah hian Pu Zohmangaihsanga Chhakchhuak Sub-Hqrs YMA Lunglei Executive Committee member chuan hun kaihruaiin Lunglei SP, Sub-Hqrs YMA, MZP Hqrs Lunglei leh MSU Regional Hqrs Lunglei aiawhte’n thu an sawi a, YMA Ramthar Branch aiawhte’n an telpui bawk.
Lunglei SP Pu J.Lalmuankima chuan, Camp-a awm raltlante chu an awmna hmuna him leh hlim taka awm an duh chuan rukruk leh ruihhlo laka an fimhlim a ngaih thu leh dan lova sumdawnna te ti ve lo turin a chah a. Dan lova sumdawnna a inhnamhnawih an hriat chuan a rang lama thuneitute hnena thlen turin a hrilh a, Mizorama cheng Mizote an ṭanpui ve theihna anih thu a sawi.
Lunglei SP chuan Mizoram chhunga ruihhlo kaihhnawiha an man tam zawk chu Burma mi an nih thu sawiin, heng mite hian a inhnamhnawih ve lote an tih hmingchhiat thu a sawi a. Misual tlemte avanga an hmingchhiatna chu ṭangruala an beih let a ṭul thu leh heng misualte avang hian an awmna hmunah an awm reng theihloh a hlauhawm thu a sawi.
Lunglei SP chuan chuan raltlan nunaute leh kum upa lamte him taka an awm zel a duh thu sawiin, an harsatnate thuneitute hnenah thlena an theihna zawnah an ṭanpui zel tur thu a sawi bawk a ni.
MZP Hqrs Lunglei Secretary Pu K.Lalchhuanawma pawhin Camp a awm zirlai awm zatte leh an harsatna tawhte MZP Hqrs Lunglei hnenah thlen zel turin a chah a. Rukruk, ruihhlo leh dan lova sumdawnna lakah inhnamhnawih lo turin a chah bawk.
Pu Lalthangliana MSU Regional Hqrs Lunglei President chuan, Camp-a raltlan awmte chu zirna ngai pawimawh tur leh ruihhlo laka fihlim turin a chah nghal bawk a ni.
He hunah hian Sub-Hqrs YMA Asst. Secretary Pu R.Laldinliana pawhin Myanmar politics buaina avanga an raltlan chu YMA-in pawi a tih thu sawiin, ram buai pawh a zia chho zel tawh thu leh an ramah ngei an let leh vat theih YMA-in a duh thu a sawi a. Mizorama an awm chhung chuan thuneitute duhdana awm turin a chah a, ruihhlo leh dan phalloh thil dang laka fihlim turin a chah nghal bawk.
Tun dinhmunah Nghasih Camp-ah hian in 23 awmin, mi 122 an khawsa mek a ni. (MZP Hqrs Lunglei PR- 22 of 2024-2026)
