Lunglei SP Pu Shivam Shiddarth, IPS leh MJA Dist Hqrs Lunglei an inkawm

31 Aug 2026: Lunglei District Superintendent of Police, Pu Shivam Shiddarth IPS leh MJA District Headquarters Lunglei te chu vawiin khan Lunglei SP Office Chamber-ah an inkawm.

SP Pu Shivam Shiddarth, IPS chuan, Lunglei SP a nihna zawnah a ngaihpawimawh te sawiin, Thalaite’n Drugs an hmang sual nasa chu pawi a tih thu a sawi a. Drugs dona kawngah Police leh Mipuite’n thawhhona tha tak an neih theihna tura theihtawp chhuah a tum thu sawiin, Dan phal loh thil, Myanmar leh Bangladesh atanga lo lut a awm chuan Mipuite’n ring ngam taka Police an hriattir thuai theih nan, Mipui nen thawhhona tha neih ngei a duh thu a sawi.

Pu Shivam Shiddarth, IPS chuan, Drugs hmang sual thinte chu chhanchhuah dan kawng zawn a tul tih a sawi a. La hmang sual ve lo te chu venhim an ngai tih sawiin, hemi kawnga hmalakna atan hian, Drugs chu tihrem tuma hmalak a tula a hriat thu a sawi a.

Drugs lo lut ru venna kawngah District chhung mipuite chu Police te thawhpui tura ngenin, Tualchhunga a chevel man kawngah pawh thawhhopui turin a sawm a ni.

MJA Member-te chuan, Lunglei District leh Lunglei khawpuia an ngaihmawh thil te sawiin, Dan lova Foreigner lo lut chungchang te leh, SIR neih meka Lunglei District chhunga issue awm theite, SP a nihna anga hriatpui turin an sawm a. Lunglei khawpui chhung a ralmuan zawkna turin, Zan lama Police Patrolling mumal zawka neih tul an tih thu te, Lungleia Traffic Police indaih lohna tiziaawm tura Volunteer leh Home Guard Personel te nena tan ho dan ngaihtuah a tul thu te, Khawpui chhunga CCTV awmsa te thuam that leh, vuah belh a tul thu te, VDP tihchak dan tur te leh Tunhnai Mualthuam thil thleng chungchang te sawiin, zawhna an zawt a. Lunglei SP chuan MJA member-te thusawi chu a tul anga hma lak dan tur a ngaihtuah tur thu a sawi.

Pu Shivam Shiddarth, IPS hi kum 2020 Batch IPS niin, Kashmir-ah a awm hnuin, Hnahthial District SP mawhphurhna a chelh a, tunhnaiah Lunglei SP mawhphurhna chelh turin a hna a zawm a ni.

Maharastra State atanga lo chhuak niin, Delhi College of Engineering atangin B,Tech a zova, UPSC ezam tura inbuatsaihin, Kum 2020 ah IPS ah a tling a ni.

Pi Navneet Mann, IAS nen inneiin, Lungleiah post ve ve an ni a. A nupui Pi Navneet Mann IAS chu Lunglei District Deputy Commissioner niin, a ni hi Kum 2020 Batch IAS a ni.