Lungleiah State University a awm ngei theih nan a huhova hmalak anih theih nan MJA-te bultan turin an ngen
01 Sept 2025: Vawiin chhun khan Chhimbial Chhantu hruaitute leh MJA Lunglei memberte chu Lunglei Press Club Committee Room-ah inkawmin, Lungleia State University din ngei an duh thu an sawiho.
MJA Lunglei President Pu H.Lalthansanga’n a kaihruaia, Lunglei thanmawh bawk chu mahniin hmingthatna kan lak dawn loh chuan Lunglei tan a tute pawl emaw hmalakna kan thlawp tha duhlo hi a ni a ti.
Chhimbial Chhantu President Rev.F.Sangvela chuan State University chu Chhimbial Chhantu mai nilo, chhim lam mipui hrim hrim hian hian Lungleiah awm se kan duh niin a lang a ti a, Aizawla dah kher tum chu NEP thil tum ber pawh a nilo in a lang a ti a, Aizawlah bawk bul tan an tum leh hi enge a chhan ni ang aw tih ngaihtuahnaah a awm a ni a ti.
Hemi kawnga hmalakna kal zel turah hian Chhimbial chhantu Committee chuan pawl hrang hrangte nen hma kan lak ho theih nan MJA hian bul tan se an duh avanga MJA te nen pawh inkawmna hun neih chu an rawt a ni tih a sawi.
Chhimbial Chhantu General Secretary Pu Lalnunsanga Pachuau pawhin MSU Lungleia a awm ngei theih nan hmalak tul an tih thu leh MJA chuan bul tan sak se tha ber tura an ngaih thu a sawi a, Lunglei lam hi nawrchep kan nihna a rei tawh lutuka kan rilru pawh hi a khawlo zo tawh nia a hriat thu a sawi bawk.
MJA te hian Chhimbial Chhantu hruaitute chu an duhdan lehkha ziaka thlen tura ngenin lehkha an hmuh velah ngaihtuah an tum tih an sawi.
