LushAI Healthy Lunglei app mi 200 chuangin download tawh

03 Feb 2026: Vawiin khan DC Office, Health & FW leh I&PR official-te, Lungleia damdawi zuar (pharmacist)-te leh LushAITech aiawhte chuan Lunglei DC Pi Navneet Mann kaihhruaiin a hnathawh pindanah “LushAI Healthy Lunglei” Mobile App chungchang an sawi ho.

Healthy Lunglei app hi Android Playstore aṭangin mi 160, Apple iOS App Store aṭangin mi 70, belh khawmin mi 230-in an phone-ah an dah lut (download) tawh tih tarlan a ni a. Mi tam zawkin an hman ṭangkai theih nan branch YMA leh college hrang hrangah te mawhphurtu bik (nodal officer) inruatin, nodal officer-te tan March thla laihawl velah inzirtirna buatsaih ni se, tih a ni a. App hmang ṭha zual YMA branch 3 leh college te tan lawmman siam ni se, tih a ni bawk.

LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziahluhna te, he app-a inziaklut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk a. Android hmangte tan https://play.google.com/store/apps/details?id=com.lushaihealthylunglei.android aṭangin leh iOS hmangte tan https://apps.apple.com/in/app/lhl/id6755673586 aṭangin download theih a ni.