16 Oct 2025: All NGOs Mamit leh Commercial Vehicle Association Mamit chuan an phut anga Mamit district kawng chhe lutuk siam that anih loh avangin vawiin atangin Mamit panna kawng an dang tan.
Joint Committee-in thuchhuah an lo siam tawh angin Mamit District tana châk lakna leh veivahna Motor kawngpui pawimawh, Mamit to Aizawl, Mamit to Bairabi leh Mamit to Zawlnuam te chu lirthei eng chi tan pawh kal hleih theih loh khawpa a chhia siam tha tura sorkar an ngenna, an beisei anga hmalakna mumal an hmuh loh avangin ruahmanna an lo siam tawh angin, heng Mamit panna kawngpui pathum te hi vawiin atangin an khar tan a ni.
Hemi chungchangah hian nizan khan District Bawrhsap Pu K.Laltlawmlova chuan All NGO, Commercial Vehicle Owner Association te leh PWD thuneitute kawmin, Mamit khawpui leh District chhung khaw dang te’n harsatna an neih dan chipchiar takin a sawipui a, PWD Engineer in Chief, Pu H.Zoramliana chuan National Highway kawngah Mizoram PWD te’n thuneihna pumhlum an neiloh thu sawiin mipuiin harsatna nasa tak an tawk tih a hriatpui thu a sawi a, kawngpui dan chah an tum chu a hriatthiampui rualin, an kawngpui dan chah titawpa sorkar hmalakna ngaichang turin a ngen a, vawiin atangin kawngpui thawmthat hna chu chak zawka hmalak a ni dawn tih a sawi a ni. (DD)
