MCU-in, STA man bithliah zawm lo va tlan thin chu mipui sum dik lo taka rawkna a ni, an ti
14 Oct 2024: Mizoram Consumer’s Union chuan man chawia mipui phur lirtheiten State Transport Authority-in a man an bithliah zawm lo va an pawl rate siam ang zawma an tlan thin chu mipui sum dik lo taka rawkna a ni, an ti.
Consumer’s Union thuchhuah tarlan danin tunhnai chauh nilo tun hma atangin man chawia mipui phur lirtheite’n sawrkarin chuan man a bithliah zawm duh lovin an pawlin chuan man an siam angin an tlan thin an ti a, hei hi dan pawisak lohna a ni tih sawiin mipuite rawkna a ni an ti a, STA rate siam anga tlan tha duh lo te laka dan anga action lak mumal a awm thin loh avangin lirtheia sumdawngte an pawngpawrh zel thin chu pawi an tih thu an sawi.
Thuchhuah tarlan danin mipui dinhmun harsatna hrethiama sawrkarin lirthei chuan man a bithliah ang zawm hram hram turin an ngen tih sawiin, Sawrkar pawh mipui tana ding an nih angin dan bawhchhe tute lakah dân anga action la ngam turin an ngen tih an sawi bawk.
STA chuan March thla khan thuchhuah siamin man chawia mipui phur lirthei service, taxi, autorickshaw leh maxicab te chuan man a bithliah thar a, 2-Wheeler taxi chu kilometre 1 ah Rs 30 niin, kilometre khat hnuah erawh KM tinah Rs 20 zel a ni ang a, taxi pangaiah KM 1-ah Rs 55 niin, hemi hnuah KM tinah Rs 45 zel a ni ang a, autorickshaw chuan man chu KM khatah Rs 35 niin, a hnu KM tinah Rs 25 zel a ni ang a, maxicab chu metal road a a tlanin, KM 1-ah Rs 3.50 leh metal road lovah Rs 4 a ni dawn a ni. (AIR)
