Mi kut tuara thihna thuah JAC-in thuchhuah a siam

07 Oct 2026: Joint Action Committee Rahsiveng, Lunglei chuan thuchhuah siamin, September 26, 2026 tlaia Tv Ricky Lalhruaitluanga (32) in mi kut a tawrh avanga October 4, 2026 dar 11:18 AM ah a nunna hlu tak a chan chu Joint Action Committee, Rahsiveng chuan pawi a ti takzet a, an khawtlangah hetiang thil duhawm lo tak mai a thleng hi pawi a tiin a duhlo hle a, tun hnuah hetiang thil hi thleng tawh ngailo se a duh tak zet tih a tarlang.

Tv Ricky Lalhruaitluanga kut thlaktu Lalthanpuia (23) S/o Lalengmawii chu dan anga na thei ang bera hrem anih theih nan Joint Action Committee, Rahsiveng chuan thuneitute hmala turin a phut tlat a, Kut tuartu chhungkua te tana zangnadawmna sorkar atanga awm thei ang te pek thuai an nih theih nan a ngen nghal tih a tarlang bawk.

An khawtlanga Ruihhlo zuarte chungah Joint Action Committee, Rahsiveng chuan theihpatawpin hma ala zel dawn a, hetiang mi Rahsiveng chhunga awm te fimkhur tur leh bansan turin a ngen nghal a. Khawtlang pawisalo leh zahlo te chungah a theih dan ang anga hmalak zel a ni ang, a ti.

Joint Action Committee, Rahsiveng chuan Tv Ricky Lalhruaitluanga chhungte a tawrhpui takzet thu sawiin, Pathianin thlamuanin awmpui zel se tih chu a tawngtaipuina a ni, a ti.