Mibo ruang hmuh zaninah vui dawn

10 Feb 2026: December ni 21, 2025 atanga a chin hriat lo va bo Ngurthanmawia Sailo (30) S/o Lalliana Sailo, Farmveng Lunglei ruang chu vawiin chawhnu dar 3:00 vel khan Lunglei Ramthar huam chhung Tuilut lui kamah hmuh a ni.

Ngura ruang hi Bawngchaw zawng mipakhatin Tuilut lui kamah hian hmuin, hetianga ruang hmuh a ni tih hriat velah Ramthar YMA leh Farmveng YMA te bakah Police lam-te’n a tul ang ang buaipui nghalin, ruang hi chhe viau tawh mahse a thawmhnaw hak atangin Ngura chhungte hian an finfiah thei a ni.

Ngurthanmawia ruang hi vawiin tlai vek khan Post mortem turin Lunglei Civil Hospital panpui nghal niin, zanin hian Farmveng thlanmualah vui liam nghal a ni ang.

Ngura hi Lunglei District khawthlang lam Sesawm khua Primary School a zirtirtu thawk mek niin nikum December ni 21 atanga a bo hnu khan Mizo dan angin Lunglei khawpui chhung YMA Branch hrang hrangte chuan ni 7 chhung lo zawng tawhin hemi hnu hian a zawn hna hi an titawp a ni.