Minister-in Living Museum a hawng

25 Oct 2025: Pu C. Lalsawivunga, Art & Culture Minister chuan vawiin khan Art & Culture Department buatsaih Living Museum hawnna hun Mizo Typical Village, Zokhua, Falkawnah khuallian niin a hmanpui a. Zokhua, Falkawn kawtchhuaha Sekawtrawlhah kawi hrui sat chatin a hawng a ni.

Khuallian chuan, Living Museum buatsaih a ni chu a hlu a tih thu leh thangtharte’n pipute khawsak dan leh nunphung an hriat thar nan te, tualchhung mite leh thalaite tana sum lakluhna hnar atan te, zinmite’n Mizo kutchhuak an hmuha an lei theih nan leh Mizo nihna leh hnam zia an zir theih nan a pawimawh thu a sawi a. Ei leh in pawh Mizo taka buatsaih a nih a, Living Museum chu tihchangtlun a nih chhoh zel a beisei thu a sawi a ni.

Live Museum hawnna hun hi Pi Zodingpuii, Secretary, Art & Culture Department chuan a kaihruai a. Falkawn khuaa NGO hrang hrang – YMA, MHIP, MUP atanga thlan chhuahte leh Lenkawl Cultural Club-te’n hmanlai Mizo khaw nundan an entir a ni.

Live Museum Show hi a bul tan nan kartin Inrinni apianga neih tura ruahman a ni a. Art & Culture Department chuan heng ni – October ni 25, November ni 1, ni 8 leh ni 15, 2025-ahte hian Live Museum buatsaih phawt a tum a, a tul dan azira buatsaih chhunzawm zel tur a ni. Mizoram State pawn atanga khualzin lo lut an pun belh zel avang te, tualchhung mipuite Local Tourism-ah kan harh thar zel avangtein chung mite en tur leh chhim theih tur chuan Mizo Culture leh Tradition chawilar zel nan Live Museum hi buatsaih a ni. (DIPR)