10 Oct 2025: MSU General Conference vawi 23-na, Hnahthial District a neih mek chu a zan hnihna, nizan Vantlang Inkhawm Programme, Minister of State, Prof.Lalnilawma’n khuallian niin a hmanpui.
Khuallian chuan tuna National Education Policy, 2020 hman mekin a ngaih pawimawh deuh pakhat chu harsatna sutkian dan – problem solving skills a nih thu sawiin chu chu nuna zirlai pawimawh tak pakhat a ni a ti a. Hlawhtlinna chauh chan tum lovin harsatna tawh hi nuna thil pawimawh tak mai, mihring min chher hriamtu a ni tih hre turin zirlaite chu a chah a ni. Graduate degree nei, nu leh pa a la innghat nih ai chuan eng anga hna hniama kan ngaih pawh thawk hreh lo, mahni intodelh nih hi a zahawm zawk, a ti bawk.
“Hlawhtlinna hi Hlawhchhamna atanga pen khatah a awm” tiin zirlaite chu an hlawhchham pawn beidawng lova, bei hram hram zel turin a fuih a. Mahniin nuam kan tih chin atanga kan pen chhuah loh chuan hlawhtlinna kan chan loh mai bakah kan nih theih tur ang kan ni thei dawn lo a ni tiin zirlaite chu harsatna leh hrehawmna paltlang ngam turin a fuih a ni.
Nizan vantlang inkhawm hi MSU Finance Secretary, C.Lalhmangaihzuala’n kaihhruaiin mal zai leh hnam lam hrang hrang nen hun hman a ni.
Vawiin chawhma Vantlang Inkhawmah Chief Minister, Pu Lalduhoma chuan Khuallian niin hun a hmanpui.
