Missionary Day pualin Thingpui ruai leh Ruai

10 Jan 2026: Naktuk January 11, 2026 hi Mizoram-a Missionary hmasa ber lo thlen champha phak vawi 132-na, “Missionary Day” a ni a, hemi pual hian Lunglei khawpui chhunga BCM tualchhung Kohhran engemawzat chuan ruai an buatsaih.

Kumin Missionary Day Thupui atan “Pathian thu lo hrilhtu che u chu hre reng ula” (Hebrai 13:7) tih hman a ni.

Kohhran hrang hrangte’n Missionary Day pual hian naktuk Pathianni-ah hun hman an tum laiin, vawiin lamah BCM tualchhung kohhran engemawzatte chuan ruai nen hun an hmang.

Naktuk Missionary Day-ah hian zing lamah Pathian hnena lawmthu sawi Inkhawm neih a ni anga, Thupui thlan sa hmangin thuchah ngaihthlak a ni ang. Chawhnu lamah Pathian faka zaikhawmin hun hman chhunzawm a ni anga, zan lamah inkhawm leh zaikhawm chhunzawm a ni bawk ang.

Missionary Day-ah hian BCM Headquarters a hruaitute pawhin Kohhran te sawmna chhangin Kohhran hrang hrangah hun an hmanpui dawn a ni.

Naktuk Missionary Day- ah hian BCM hnuaia tualchhung Kohhran hrang hrangte chuan inkhawm banah Thingpui ruai an buatsaih dawn bawk.