11 Jan 2024: Vawiin hi Missionary day vawi 130-na anih angin BCM hnuaia tualchhung kohhran hrang hrangte chuan awmni khamin an hmang.
Missionary day-ah hian Lungleia BCM kohhran tam zawk chuan ruai nen lawmin zingkar atang khan fatute an thawk chhuak a, ran talhin kohhran mipuite eitur an buatsaih a ni. Chawhma Pathian biak inkhawm neihah BCM Hqrs atanga thupui thlan sa, “Kohhran hnapui chanchin tha hril” tih thupui bakah Chanchintha Mizorama a lo luh dan, chanchin tha hlutna leh a tangkaina thuchah ngaihthlak a ni tlangpui a, kohhran thenkhatah chuan Sap Upa leh Pu Buanga te chanchin leh Mizorama chanchin tha an rawn thlen dante a lem nen entirin ngaihthlak a ni bawk. Kohhran thenkhatah chuan inkhawm banah thingpui ruai buatsaih a ni a, chawhnu lamah Pathian faka zaikhawm a ni tlangpui a, tlaiah Missionary Day lawmna ruai kohhran tam zawkah theh a ni.
Missionary day-ah hian Sawrkar chawlh anih angin Office hrang hrang a inkhar a, a hmang ve lo kohhran engemawzat awm mahse Lunglei khawpui a reh hle a, dawrkai inhawng an awm zeuh zeuh laiin lirthei leh mipui veivak an tam lo hle a ni.
