25 Sept 2025: Child Welfare Committee (CWC), Aizawl District chuan thuchhauh siamin, tleirawl boxer pathum Boxing tournament a tel phal lohte chungchângah Mizoram State Sports Council (MSSC) Secretary chu lo chhui chiang tur leh Boxing tournament kallai pawh ti tawp rih tura a hriattir chungchângah chak taka hmalak a nih avangin CWC chuan lawmawm a ti hle tih an tarlang.
Hemi bawhzuina kal zelah Secretary, MSSC hnen aṭangin MIZBA insawifiahna chu CWC chuan ni 24 Sept 2025 tlaiah khan a dawng a. MSSC Secy hian CWC chu MIZBA insawifiahna hi pawm theih tur a ni em tih thuah leh, Lungleia Boxing Championship tournament tih tawp lailâwk mek chu khelh chhunzawm theih a ni em tih chungchânga thutlukna siam turin CWC chu a rawn ngen nghal bawk.
Hemi chungchâng hi CWC chuan ngun takin a ngaihtuah a. MIZBA insawifiahna hi pawm theih niin a hre lova, an ṭan chhan ber POCSO victim te identity protect an duh vang nia an sawi pawh hi chhuanlam tling lo, POCSO victim te tawrh nawn tir lehna (re-victimise na) leh POCSO victim te en hranna (discriminate) leh an dikna chanvo rahbehna ṭha lo tak niin a hria a ni. Chuvangin MIZBA insawifiahna hi CWC chuan a pawm lova, tun hnuah hetiang thil hi thleng nawn tawh lo se a duh a ni. MIZBA aiawhin an hruaitu pahnih CWC hmaah hian an rawn inlana, hemi chungchâng hi hrilhfiah niin zilhhau an ni a, MIZBA OB te kokim zawka CWC hmaa rawn inlan leh tura hriattir nghal an ni.
Lungleia Boxing tournament kal lai mek chungchangah erawh Mizoram hmun hrang hrang aṭanga Boxer ṭhahnem tak fuankhawm mekte hi an lainatawmin CWC chuan a hria a. Rilru hnual taka an awm loh nan tournament hi khelh chhunzawm tir leh phawt mai turin CWC chuan nimin ni 24 Sept 2025 tlaiah khan MSSC chu a hriattir nghal bawk a ni. (MSR)
