Aug ni 29, 2023 khan Saikuti Hall-ah Mizo Zirlai Pawl (MZP) leh Sports & Youth Services Department buatsaihin ‘Youth 20 Meet on Nationalism, Patriotism & Development’ neih a ni. He hun hi MZP Headquarters Lunglei President Lalpeksanga Chenkual-in a kaihruai a; Rajya Sabha MP Pu K.Vanlalvena chuan khuallian niin a hmanpui.

MZP General Headquarters Aizawl President Pu Lalnunmawia Pautu chuan programme hman chhan te a sawifiah a. Zirlai kalkhawmte chu ram leh hnam hmagaihna thinlung pu chunga nun hmang turin a chah bawk.

Khuallian Mizoram MP Pu K.Vanlalvena chuan zirlai kalkhawmte chu he ram nghahfâk an nih thu leh he ram la hruaitu tur an nih thu sawiin; beidawng lova, ram leh hnam hruaitu tura inchher turin a chah a. Mizo mipui tam tak rilru-ah mahnia inrelbawl duhna a awm a, hei hi ‘nationalism’ chu a ni, a ti a. Mizo a inti emaw inti rih lo emaw pawh nise, thisena unau kan ni a, unau vek kan ni, a ti bawk.

Thalai kalkhawmte chu hmasawnna atan hian hmuh theih hmasawnna chauh ni lovin sumdawnna, intodelhna leh Mizoram tharchhuah thawn chhuah kawngah te tan la thara kan ram tana theihtawp chhuah zel turin a chah a. Miin a ram leh hnam a hmangaih chuan a ram chu mi hnuaia a kun reng a phal lova, mahni intodelh turin hma a la thin, a ti a. Chhungkua atanga hma kan sawn lohva kan intodelh si loh chuan kawng leh building-ah te hma sawn mah ila awmzia a awm thui lo, a ti bawk.

Development kan tih hi nationalism leh patriotism atanga lo chhuakin, zirlai kan nih lai atangin kan ramin engnge kan mamawh tih kan ngaihtuah a tul, a ti bawk.

He huna Speaker, MZP General Headquarters Aizawl Adviser Pu Lalhruaitluanga Chawngte chuan, “Kan thlahtute’n ram zau leh mawi tak min hnutchhiah avang hian Pathian hnena lawmthu sawi tur kan ni tiin, min thlahtute hi hnam ropui an ni, a ti. Tun hma chuan Kuki leh Chin tia hming vuah sak kan ni a, hun a lo kal zel a, hming hran hrana hriat kan ni leh a, kan zavaia hming kan la nei lo niin a lang a; chutih laiin, ‘Zo’ ah hian kan inlungrual tlâng ber a, Nationalist te chuan, ‘Zohnahthlak’ tia sawiin Zo hnam pumpui min sawi thin a, hei hi kan pawm tlâng ber bawk a ni,” a ti.

Pu Lalhruaitluanga Chawngte chuan, “Khawvel politics vir vel vanga thendarhin kan awm a, kan chenna chu eng sorkar hnuaiah pawh awm se kan inunauna a danglam chuang lo, hnam hi thisen a nih thu sawiiin, thisena inunau kan ni. He ram leh hnam hi mi rintlak leh mi dik pe turin kalkhawmte a chah a, mi rintlak lo tamna chu hmun nuam a ni ngai lo,” a ti bawk.

Speaker chuan, zirlai kalkhawmte chu hnam hmangaihna thinlung pu chunga an zirlai leh an thil tih engkim ti tura chahin, lu chhum ban chhum huama min thlahtute’n an sah zau he ram hi rinawmna leh dikna nena enkawl turin a chah a ni.

He hunah hian Lunglei Gov’t College, Gov’t J.Buana College, Mizoram Polytechnic Lunglei, Gov’t High School Lunglei leh Gov’t Leitlangpui High School zirlai thahnem tak an tel a ni.