Mizo thalai ram pawna hnathawka tirchhuak thinte zawm tur Dan chu LESDE hnuaiah dah thar a ni
Mizo thalai, ram pawna hnathawka tirchhuak thinte zawm tur Dan, The Mizoram Placement Agencies Act 2015, Home Department hnuaia kenkawh thin chu Labour, Employment, Skill Development and Entrepreneurship (LESDE) hnuaiah dah thar a ni.
He thu hi LESDE Minister Pu Lalnghinglova Hmar-in kan Correspondent hnenah sawiin, Chief Minister Pu Lalduhoma kaihhruai Council of Minister thutkhawm hnuhnung berah he thu hi an pawm a; a enkawltu inthlakna tur rawtna hi GAD atanga lut a ni, a ti a. Mizo thalai ram pawna hnathawka tirchhuak thinte zawm tur Dan hi anih dan tur ang taka kenkawh a ni dawn tih sawiin dik taka hmang turin department-in theihtawp a chhuah dawn, a ti.
Dubai-a Mizo hmeichhiate harsatna tawh chungchanga Congress thalai hruaitute nen an inkawmnaah Chief Minister Pu Lalduhoma’n April ni 29 khan ram pawna Mizo thalaite thawn chhuak thin Private Placement Agency 27 te chu an licence cancel-sak an ni dawn tih a lo sawi tawh, Minister chuan a ti a. Dan hman mek chu a rang thei ang bera siam that a ngai tih sawiin ram pawna hna thawk tur thawn chhuak tur chuan Immigration Act, 1983 hnuaia Protector of Immigrant hnuaiah license an dil tur a ni, a ti a. Hei hi Ministry of Overseas India Affairs hnuaia awm niin hemi hnuaia license nei thlap te chuan harsatna an tawk ngai lo tih a sawi. (AIR)
