29 Aug 2025: Iskut tharchhuah in tlakhniam lam zel a pan chungchang zirchianna Mission Foundation Movement in Research Report an buatsaih chu vawiin khan Agriculture & Farmers’ Welfare Minister Pu PC Vanlalruata’n a pisaah a tlangzarh.

Minister chuan, he zirbingna hi a bul tanna tur chauh a la ni tih sawiin, sawrkar chuan Iskut chingtute nen inkawmho a, hmalak chhoh zel dan tur ruahmanna siam a tum thu a sawi a. KVK Selesih chu loneitute tan thil tangkai tak a la ni chho zel dawn a ti bawk.

Durtlang, Sihphir leh Lungdaia Iskut thar a lo tlem tial tial nachhan zirchianna hi Ministry of Tribal Affairs, TRI scheme hnuaiah Rs Nuai 25 senga Social Welfare Department kaltlanga thawh a ni a, kum 1 chuang he zirchianna hi kalpui a nih thu Lalramchuanzela, Executive Director, MFM chuan a sawi.

Project Coordinator HL Lalrinawma’n report a pe a. Sihphir, Durtlang leh Lungdaiah hian Iskut tam tham tak tharchhuah a ni tawh thin a, state pawnah te pawh thawnchhuakin chhungkaw tam takin eizawn nan an hmang thin. Amaherawhchu, kum 10 kalta vela tang khan Iskut tharchhuah hi a tlem tial tial a, tun hnaiah phei chuan a zuih ral ti tih hial a ni.

He zirbingna in a hmuchhuah tlangpui te chu –

1. Ram leilung te hi a thur deuh vek a, al a tam a, leiin a tui pai theihna a tlahniam
2. SOC (leia thil tawih awm) a tlem tial tial a
3. Thlaiin an mawhmawh (NPK ) duh khawp an pai lo
4 .Rannung in a tichhe nasa hle bawk.

Heng te hi a chhan langsar zual a ni :

1. Sik leh sa inthlak in a nghawng
2. A chinna hmun a awih vang
3. Chemical fertilizer an lo hmang nasa tawh a, tihtawp thut a nih vang
4. Technical Training mumal an dawng tam tawklo

5. Hun rei tak a hmun ngaiah chin thin a ni a, soil testing neih loh avangin farmer ten an lei dinhmun an hre chiang lo
6.Tui an tlachham

Project Coordinator hian hmalak zelna tur (recommendation) point hrang hrang a tarlang bawk. (DIPR)