Mizoram a Oil Depot din anih theih dan tur sawiho

18th Oct, 2026 : Vawiin khan Chief Minister’s Conference Hall-ah Chief Minister Pu Lalduhoma hovin Mizoram a Oil Depot din anih theih dan tur sawiho a ni a, Pu B.Lalchhanzova – Minister for Food, Civil Supplies & Consumer Affairs, Pu Khilli Ram Meena, Chief Secretary, Pu Vanlaldina Fanai, Finance Commissioner, Pu T.L Guite, Secretary, Law & Judicial leh officials dangte bakah All Mizoram Petroleum Dealers’ Association (AMPEDA) lam atangin Pu K.Lalnghakliana, President, Pu Lalbiakzama, Sr. Vice President (Speaker, Mizoram Assembly) leh an pawl hruaitu dangte an tel.

Mizoramin Oil Depot a neih ve ngei theih nan a theih ang angin hma lak zel a ni a. Indian Oil Corporation Ltd. (IOCL) chu an mamawh ang ramte kawhhmuh a, thil tul dangte pawh a theih anga ngaihtuahsak zel an ni.

Vawiina meeting hian hmalaknate chak zawka a kal theih nan Central Ministry leh NEC lamte pawh dawr ve ni se, an ti a. Thenawm state ten Oil Depot an neih tawh dan leh an kalphungte zir tura official-te tirh chhuah tha an ti bawk.