09 June 2025: India rama sawrkar damdawi in ṭha bik tehnaah Mizoram chhunga damdawi in pahnih – Mamit District Hospital leh Bukpui PHC, Kolasib District te an tel thar.
Dr. Lily Chhakchhuak, Mission Director, National Health Mission, Health & Family Welfare Department chuan India rama sawrkar damdawi in ṭha bik tehna, National Quality Assurance Standards (NQAS)-ah Mamit District Hospital chuan 86.09% an hmu tih a sawi.
Mamit District Hospital bakah hian Primary Health Centre zinga NQAS national certificate hmu thar Bukpui PHC, Kolasib District niin, point 94.94% an hmu. PHC zingah NQAS National Certificate hmu hi 12 an awm ta a ni.
Heti hian Mizoram chhunga Sawrkar damdawi in 21 te chu NQAS national certificate nei tawh an ni a. Tunah hian sawrkar damdawi in 26 velin state level certificate nei tawhin national certificate hi an dil mek bawk a ni.
Health Minister, Pi Lalrinpuii chuan, India rama damdawi in ṭha bik thlan chhuah zingah Mizorama damdawi in an awm belh zel chu Mizoram tan mellung pawimawh tak a nih thu leh damdawi in, district leh state-a thawktu zawng zawng te thawhrimna leh taimakna chhuanawm a tih thu a sawi.
