11 Oct 2024: Vawiin chawhma dar 11:00 khan A.T.I Auditorium, MINECO, Aizawl-ah Mizoram Information Commission buatsaih Right to Information Week, 2024 hman a ni a, Dr.Vanlalthlana, Information & Public Relations Minister chuan khuallian niin a hmanpui.
Khuallian I&PR Minister chuan hriatna chu chakna anih angin huaisen taka kan tihtur kan tih theih nan information data dik leh tha kan neih a pawimawh thu a sawi a. RTI Act chu kan ram Sorkar inrelbawlna tha zawk democracy tichangtlungtu ni se a duh thu sawiin sawrkar khalh ngil a, a hnathawkte fimkhur tirtu ni zel se a duhthu a sawi. Sawrkar pawh hian vengtu tha a neih a pawimawh thu sawiin mipuite chu he dan hi taima taka hmang a, kan thlan tlin te vil zui chu opposition lam chauh ni lovin mitin mawhphurhna a nih thu a sawi a. DAA/SPIO/ASPIO kalkawmte hnenah an mawhphurna te tha taka hlen tura chahin kan thlan tlin MLA te chu zalenna (privilege) an neih angin RTI zawhna an neih te Ni 15 chhunga acknowledgement pe a, a hun tiam Ni 30 chhung ngeia chhanna pek chu an tihmakmawh a nih thu a sawi a ni.
Pu John Neihlaia, Chief Information Commissioner chuan kalkhawmte lawmna thu sawiin RTI chu Citizens te tichaktu leh Constitution a Rights hrang hrang kan neih te ang tho-a kan dikna chanvo a nih angin hman tam leh hman tangkai a pawimawh thu a sawi a ni.
Mizoram-ah RTI Act hman a nih atanga kumin October Ni 1 thleng khan department hrang hrangah zawhna 35,080 dawn a ni tawh a, chung atanga an zawhna chhanna-ah lungawi lohna avanga First Appellate, Department Appellate Authority (DAA) a zualko chu 561 chauh a nih thu sawiin, SPIO leh ASPIO te thawhthat zar a nih thu a sawi a. Second Appellate Authority, Mizoram Information Commission (MIC)-a Chief Information Commissioner ho a ngaihtuah thinah 172 chauh a luh thu a tarlang bawk.
RTI Act Rules-in a phut angin VCP leh LC Chairman te chu SPIO (State Public Information Officer) anga ruat vek an ni a. Vengchhung hnathawh leh hmalakna te pawh he dan hmanga zawhna siam theih a nih thu leh NGO te’n sawrkar atanga tanpuina (30% of project Cost emaw Nuai khat, a tlem zawk zawk) dawng te chu hman atangin a tupawh a duh apiangin Rs 10 chawiin an hriat duh zawhna an dil theih bawk thu he hunah hian tarlan a ni.
This website uses cookies to improve your web experience.