01 Sept 2025: Home Minister Pu K.Sapdanga’n vawiin khan a pisaah Mizorama ruihhlo do beihpui thlakna tur khuh hawnna a nei. He hunah hian Excise & Narcotics Minister Pu Lalnghinglova Hmar, Home Department Secretary, IGP (L&O), Aizawl DC leh SP bakah Excise & narcotics leh Police hotu pawimawhte an tel a, Central YMA hruaitute pawh an tel.
Home Minister chuan Ruihhlo laka kan ram a him theih nan September, 2025 atanga December, 2025 chhung hian Mizoram-ah Ruihhlo Dona Beihpui (Operation Against Trafficking and Use of Drugs and Narcotics in Mizoram) kalpui tum a nih angin vawiin September ni 1, 2025 hian a khuhhawnna (launching programme) hun hman a nih thu a sawi a ni.
August ni 7, 2025 khan Mizoram Sorkar a Home Department, Mizoram Excise & Narcotics Department, Mizoram Police, SIB te leh CYMA hruaituten awmze nei leh zuala ruihhlo do anih theih nan meeting neiin uluk taka sawihona leh inrawnna neih a ni a. He meeting-ah hian hma lak dan tur ruahmanna a siam a ni.
Ruihhlo lo luhna hmun ni a hriat hmun 22 te tlawhchhuak a, a bul hnaia khua zawng zawngah awareness campaign neih nih se tih a ni a. IGP (Law & Order), Mizoram leh CYMA team te chuan dt.25.08.2025 atanga dt.29.08.2025 chhung khan Champhai District a khaw hrang hrangah ruihhlo dopui thlak tur chungchangah hian awareness campaign neiin hun a hmang a ni.
Dt.07.08.2025 a meeting a sawilan danin Mizoram kaltlanga a hlawma ruihhlo tawlhruk te hi Mizoram pawnah thleng thlain chung chu State dang atangin Mizoramah hmankhawp (consumable quantity) in Mizoramah a lo let leh thin tih tarlan a ni a. Hemi chungchangah dt.30.08.2025 khan Home Minister hovin Home Department a hotute, Mizoram Police leh Kolasib District Administration leh CYMA hotu te’n Kolasib District-a Bairabi leh Vairengte te leh hmun hrang hrang an tlawh a. Khawtlang hruaitute nen ruihhlo lo lut tur awmze nei zawk a dan a nih theih nan inkawmhona hun hman niin ruahmanna te uluk taka sawiho a ni.
Ruihhlo do beihpui thlak nan hian Sorkarin pawisa pawh a tul anga hman tur ruahhman bawk a ni.
Mizoram Police hnuaiah Special Squad mi 30 awmna din niin anni hian training tha tak an neih hnuah vawiin atangin an duty-na tur hmunah an duty tan ang a, khawtlang hruaitute leh YMA te nen thawkhovin, ngawrh takin hma an la dawn a ni. (DIPR)
