7 Jan 2025: Nimin khan Health Minister Pi Lalrinpuii kaihhruainain Health Department hotute chuan tunlai natna leng thar Human Metapneumovirus (HMPV) chungchanga India ram leh Mizoram dinhmunte an thlirho a, ruahmanna hrang hrang an siam nghal. Health Minister chairman-na hnuaiah he natna chungchang viltu tur ‘Core Committee on HMPV’ din nghal niin, State level-ah leh District tinah Rapid Response Team te pawh siam a ni bawk. Hriselna kawnga thawktute leh mipuite lo hriat atan a hnuaia Thuchhuah siam a ni :
1. Tun tum China a hrileng HMPV hi tlang hrileng chi khat a ni a, kum danga leng ṭhin ang tho a ni. Tunah hian Karnataka state-ah naute thla thum mi leh thla riat mi ah hmuhchhuah a ni a, an dinhmun ngaihtuahawm a ni lo a, dam lam pan zelin pakhat chu damdawiin aṭanga chhuah tawh a ni.
2. He natna hrik hi China chauh ni lo, khawvel pumah kum tin a leng a, kumtluan a leng a ni a, hritlang satliah angin a langchhuak thin.
3. Health Department chuan IDSP kaltlangin he natna hi uluk takin a vil reng a, tun hnaiah Influenza like illness (ILI) leh Severe Acute Respiratory Illness (SARI) case tam thar thut report a awm hran lo.
4. ICMR leh a hnuaia laboratory hrang hrangin respiratory virus an test te: adenovirus, HMPV, RSV, etc. positive pung thut a awm lo. Mizoramah pawh Zoram Medical College (ZMC) ah test theih tura ruahmanna siam a ni.
5. Hetiang thil thleng thut a inralrinna ram pum huap drill neih tawh chinah respiratory illness lo pun belh pawh nise, inpuahchahna ṭha tak neih a ni.
Health system leh Surveillance network in uluk leh fimkhur takin a vil reng a, hrileng darh palh thutah pawh hma la vat thei turin Health Department chu a inring reng a ni. Sawrkar damdawiin leh private hospital zawng zawng ten IHIP report hmanga nitin hetiang ang case (ILI, SARI etc.) an neih leh natna dang report thin turte uluk leh kim taka report turin sawrkar chuan a hriattir a ni. Tin, Pneumonia natna thleng theih laka control programme/ SAANS campaign hi Mizoram district zawng zawngah kalpui mek a niin, he campaign hi hlawhtling taka kalpui a nih theih nan thawktute leh mipuiten theihtawp chhuah turin Health Department chuan mitinte a ngen bawk.
Mipuite pawh hetiang natna rinhlelh kai an awm a nih chuan, mahni awmna aṭanga hnai ber Sub-centre/Health and Wellness Center emaw damdawiinah in-report vat turin Health & Family Welfare Department chuan a chah a. He hritlang natna hi tlang hrileng chikhat a ni a, kum danga leng thin ang tho a nih avangin Sawrkar chuan lo chiai mai lo turin mipuite a chah a ni.
Tlang hrileng laka inven dan mipuite hriattur: 1. Uluk taka sahbawn nen kut sil ṭhin tur (second 20 chhung sahbawn a nuai tur).
2. Kut fai lovin mit, hnar leh ka khawih loh tur.
3. Hritlang damlote in awm hnaih lutuk loh tur.
4. Khuh leh hahchhiauvin ka leh hnar hup tur.
5. Disinfectants hmanga vawnban te hrukfai thin tur.
6. Hritlan lai chuan ina tawmim nise.
