18 Sept 2024: Mizoram chak lak luhna kawngpui dinhmun chu PWD Minister Pu Vanlalhlana leh Deputy Speaker Pu Lalfamkima hovin Mizoram Truck Owners Association ten an enfiah a; chak zawka kawng siam hna thawh a nih zel theih nan PWD chuan Division dang atangin Khawl leh Hnathawktu an inchahluh belh.
Minister chuan helai kawng avanga harsatna thleng mek chu engtia hmalak tur nge tih a hmunah ngei kala enfiah a nih thu a sawi a; chak zawka hnathawh a nih theih nan Division danga Engineer te leh Khawl te pawh chah luh belh a nih mek bakah, hnathawhna atana mamawh dang te pawh ruahmanna siam nghal a nih tur thu a sawi a. Hnathawhna tura sum awm thei ang ang te pawh a theih ang anga ngaihtuah mek zel a ni a ti.
He hunah hian Minister, Deputy Speaker leh Lirthei enkawltu pawl hruaitute chuan chak zawka hmalak a nih theih dan sawiho nghalin, hnathawhna hmuna lirthei tangkhang leh veivak an awmlohna tura hmalak nise an ti a; Tuialhthei phurtuten tlan loh an rel avanga tuialhthei chungchanga harsatna thleng mek leh, kawng siam hna thawktute ngei pawhin harsatna an tawk tan nia hriat a nih avangin, Tuialhthei phurtute chu kawng chhia thlen hma, Kolasib District chhunga load la tur an nih chuan kal remti tura ngen nise an ti a ni.
Kawnpui leh Khamrang inkar bikah Lirthei veivakin kawng siam hnathawh a tihbuai lohnan hnathawh hun laiin lirthei dan tum a ni a. Minister ho hian Kawnpui leh Kolasib inkara Kawnpui Quarry bul leh Sethrawn bul kawng chhia te chu a hmunah thlir ho nghal a ni a; Lirthei lian ke 6 nei chin an kal theih lohna Durtlang kawng leimin pawh a hmunah enfiah a ni bawk. (DDK)
