Mizoram Engineering College leh IIT Madras thawhhona tur MoU duang mek

21 Oct 2026: Vawiin tlai dar 4:30 khan MZP Hqrs Lunglei hruaituten chuan H&TE Minister Dr. Vanlalthlana a office-ah hmuin; Lungleia zirna in hrang hrang mamawh leh indaihlohnate an sawipui.

MZP Hqrs Lunglei hruaitute chuan Lungleia College zirtirtu indaihlohnate Minister hnenah hian an thlen a, Minister chuan zirtirtu indaihlohnate chu zir chiana a ṭul anga hmalak anih tur thu a lo sawi. Mizoram Engineering College session thara ṭan tura ruahmanna a awm leh awm loh MZP Hqrs Lunglei chuan Minister zawtin, Dr. Vanlalthlana chuan class ṭan tura approval an hmuh tawh thu leh Engineering College zirtirtu tur pawh lak tura ruahmanna a kal mek tawh thu sawiin, Mizoram Engineering College chu changtlung taka a kal theihna atan IIT Madras nena thawh hona tur MoU pawh duan mek a ni tih a sawi.

Hemi bakah hian MZP Hqrs Lunglei chuan Lungleia zirna in a computer indaihlohna chungchangte leh Lungleia NEET leh CUET Exam Centre dah tura an ngenna chu H&TE Minister chuan, tunah hian Mizoram college hrang hrangte NEET leh CUET exam theihna tura thuam ṭhat tumna kal mekah computer set eng emaw zat dil belh anih thu a sawi a. Heng dil belh zingah hian MPL computer set-50, GJBC computer set-40 a awm thu leh LGC chu a dahna tur a awm tawh loh avangin dil belh sak an nih loh thu sawiin, HATIM pawh exam centre atana an inhuam anih chuan computer set dil belh sak theih an nih thu a sawi a. Computer set dil belh bakah hian MPL laboratory thuam ṭhatna tur CSR fund hmanga dil mek anih thu H&TE Minister hian a sawi bawk.

H&TE Minister Dr. Vanlalthlana chuan Mizoram State University office rang taka kal pui a nih theihna a tan chak zawka hmalakna neih mek a nih thu leh thla tharah State University ram atana ruahman chu MZP Hqrs Lunglei hruaitute nena en ho nise tiin H&TE Minister chuan a sawm nghal a ni.