Mizoram Engineering College Lunglei a tui pekna hawn a ni ta

10 June 2026: SASCI sum Rs Nuai 240 chuang senga thawh, Mizoram Engineering College Lunglei Pukpui rama PHE Department-in tui a pekna, Water Supply to Mizoram Engineering College, Pukpui, Lunglei chu vawiin chawhma dar 11:00 khan Er.Zodinthari Engineer in Chief, PHED, Mizoram chuan a hawng.

Er.Zodinthari chuan Mizoram Engineering College tui pekna tur atana PHE Department Lungleia thawktute inpekna leh an hnathawh dan chu lawmawm a tih thu leh tha a tih thu sawiin, Pipe herhzawm awm lo va, welding veka zawm te chu a chhuanawm a tih thu a sawi a. Mizoram Engineering College Pukpui rama tui duh tawka hman tur pekluh a ni ta chu lawmawm a tih thu leh thawktute leh zirlaiten neitu nihna rilru pu chunga hmanga enkawl turin a ngen a ni.

E -in- C hian tun dinhmuna PHE tui la dawng phalo Lunglei Hrangchalkawn-te’n PHED tui an dawn ve theih nana hnathawhna tur SASCI-IV atangin Rs Vbc. 5.78 hmuh a nih tawh thu a tarlang bawk.

Er.V.Laldanmawia, E.E, LWSM-in Technical report a pek danin, Mizoram Engineering College Pukpui rama mi tui pekna Pukpui khaw chhung Centenary lungphun a PHE Tanky lian atangin Pipe 125mm hmangin tui lakluh a ni a, a thui zawng KM 6 chuang a ni a, hnathawh nan hian Rs Nuai 249.44 hman niin, hemi bakah hian Engineering College hmunah hian tui luhkhawmna tur SASCI sumin Tanky litre Nuai 3 leng siam a ni a, hemi Tanky atang hian Engineering College Complex a awm Building hrang hrangah pek luh leh a ni a; hna hi thla li chhunga thawh zawh a ni.

Hawnna inkhawm hi Er.Lalsanga S.E, Lunglei Circle-in kaihruaiin, Er. K.Zohmingliana C.E, PHED lawmthu a sawi a ni.