26 Nov 2023: Champhai district leh Mizoram hmun thenkhatah chuap natna chi khat pneumonia natna vei an tam hle chungin Health Department thuneitute chuan chi-aina tur a awm lo niin an sawi. Integrated Disease Surveillance Programme (IDSP) thawktute chuan kumin April leh October inkar thla 7 chhung khan Champhai district-ah pneumonia avangin mi 12 an thi tawh niin an sawi.
Champhai-a AIR correspondent chuan, thi zat hi 16 a nih tawh thu leh pneumonia vei naupang hi 700 vel an nih tawh thu a sawi a. Champhai district hospital naupang ward-a naupang 18 awm zinga 16 chu pneumonia vei an ni a. District hospital-ah khum ruak a awm tawh loh avangin mimal enkawl damdawiin lamah an thawn nual ni a sawi a ni. Champhai a damdawiin lam hnathawkte chuan nimin thlenga dinhmun chiah an la sawi theih loh thu an sawi bawk.
Hetih lai hian Director General of Health Services, Ministry of Health and Family Welfare Prof. (Dr.) Atul Goel chuan state leh UT hrang hranga National Health Mission a Mission Director-te hnenah lehkha thawnin China-ah naupang lam thawk harsatna siamtu natna vei an tam thu sorkarin a hriat thu a sawi a. Chi-aina tur a awm lo chungin hetiang lam hi uluk taka zir chian ni se, a ti a. State tina IDSP te’n thil awmdan vil ngun a, damdawiina khum leh inenkawlna lam pawh NHM Mission Director-te’n thlithlai reng ni se a ti a ni.
Kumin October thla a China hmar lama arva pul hri (H9N2) leng a naupang lamin an kai tam chungchang chu India sorkar chuan ngun takin a thlitlai reng niin an sawi a. Arva pulhri (avian influenza) kai chhawng hi mihringah chuan an tam lo niin Health Ministry thuchhuah chuan a sawi bawk a ni. (AIR, Aizawl)
