23 April 2025: Mizoram Larsap General (Dr) Vijay Kumar Singh (Retd) chuan vawiin khan Mizoram Sawrkar hnuaia Agriculture leh Horticulture Department hotute chu Raj Bhavan-ah kawm a, Sustainable Agriculture a awm theih nana pawimawh leh Department pahnihte hmalakna a sawipui.
Larsap chuan hmalakna tlo leh tluantling, thing leh mau tichereu lo leh leilung tichhe lo thei ang bera eizawnna kalpui a tul a, hei hi tun mai nilo nakin hun thlenga pawimawh a ni, a ti a. Fertilizer tel lo thlai thar chhuah kawngah tanlak nasat a tul thu sawiin, organic thlai a ni ngei a ni tih finfiahna hmun, Laboratory leh standard tha tak state puala neih a tul thu a sawi bawk.
Pi Ramdinliani, Special Secretary, Agriculture & Horticultulure Department chuan Mizoram pum zau zawng (geographical area) za zela 10 chu Agriculture leh Horticulture hnuaia hmalakna a nih thu a sawi a ni.
He hunah hian Agriculture Department leh Horticulture Department hnuaia Scheme hrang hrang hnuaia hmalakte thlirho a ni a. Organic state ni thei tura pawimawhte sawiho niin, thlai hrisel tam zawk thar kawnga hmalak tulte bakah a sawngbawlna kawnga tanlak ngaihna laite sawiho a ni.
Tun dinhmunah Mizoramah organic certified area 8,000 Hectare a awm mek thu leh 5,500 Hectare dang pawh ruahman mek a nih thu he hunah hian tarlan a ni bawk.
