09 Aug 2024: Vawiin tlai khan Pu K.Sapdanga Home Minister leh Pu Atul Bora, Minister, Border Protection and Development, Assam telna, ‘Goodwill Mission’ kaltlanga Mizoram – Assam Inter-State Border Meeting, State Guest House-ah neih a ni a. He thutkhawmnaah hian Mizoram sawrkar aiawh leh Assam sawrkar aiawh te hi State pahnih a official pawimawhte’n an tawiawm a ni.
An thutkhawm zawhah thuthar lakhawmtute nen inkawmhovin, thuchhuah intawm, ‘Joint Statement’ an siam a ni:-
**August ni 9, 2024-a Mizoram Sawrkar leh Assam Sawrkar inkara ‘Goodwill Mission’ Aizawl, Mizorama neihah hian February ni 9, 2024 a Assam leh Mizoram Chief Minister te’n State pahnih inkarah inhriatthiamna leh duhsakna nena ramri buaina chinfel a nih theih nan inpekna nghet tak nena hmalak thin ni se tia thu an dah chu nemngheh nawn leh a ni.
**State pahnihte chuan ramriah remna leh muanna vawn chhunzawm zel ni se, thil duhawm lo a thlen loh nan hmalak ni se an ti a. Ramri hnaih District thuneitu ve ve te’n a khat tawkin Joint Cultural and Sports Festival-te buatsaih thin se, hemi tur hian Jan ni 31, 2025 ral hma ngeia hmalak ni se an ti.
**State pahnih aiawhte chuan thutkhawm hmasa lo neih tawh te atanga thuchhuah intawm siam tawhte tih hlawhtlin nan hmalak zel an tum a. Hmachhawp hrang hrang siam tawh te tih hlawhtlin nan Sawrkar Official-te bawhzui tur a tih a ni a. Chung hmalakna bawhzuina ennawnin thutkhawmna neih thin tur a tih a ni. Minister kaihhruai thutkhawmna hi March ni 31, 2025 a neih leh tur a tih a ni.
**State pahnihte hian ram dang atanga kuhva ro tawlh chungchangah tumah ngaihnathiamna nei lova khauh taka hmalak chhunzawm an rem an ti.
**Assam leh Mizoram inrina bialtu Deputy Commissioner-te leh Superintendent of Police ten inter-state border (ramri hrul) ah remna leh muanna a awm reng theih nan thla tin virtual meeting neih rem tih a ni a, thla 6 dan ah dawhkan kil a thutkhawmna nei thin tur a rel a ni.
**State pahnih a palaite hian ramri buaina chinfel kawngah ramri hrul a chengte an pawimawh zia hriain an ni nena tha taka thawhho a tul tih an pawm a, ramri kaihhnawih buaina leh harsatna a awm reng rengin ramri hrul a cheng mipuite leh a kaihhnawih zawng zawng ten anmahni thu a hma la nghal mai lovin thuneitute hnenah thlen thin se tih a ni. (DIPR)
