Mizoram leh Assam sorkar aiawhte’n inbiak chhunzawm an tum

Ramri buaina chingfel tura beihna kal zelah Mizoram leh Assam sorkar aiawhte chuan thlathar August ni 9 hian Aizawl-ah inbiak chhunzawm an tum.

Home minister Pu K. Sapdanga’n Akashvani Aizawl a hrilh danin Assam sorkar hian Mizoram sorkar a rawn be pawp a, state pahnih aiawhte remchan hun dapin ruahmanna siam a ni a. Assam sorkar palaite hi an Border Prtotection and Development Minister Atul Bora-a’n a rawn ho ang a, an state home secretary bakah home department leh a kaihhnawih official dangte lokal tura ngaih a ni a. Pu K. Sapdanga hi home secretary Pu Vanlalmawia leh official dangte’n an tawiawm ang.  

Tun tumah hian an inbiak chuan state pahnih minister te inbiak vawi 4-na tur a ni dawn a ni. Assam leh Mizoram ramri buai hi kum 1972-a Mizoram UT-a hlankai a nih tan, a taka a hmun ngei a ramri rin lova North-East Areas Reorganisation Act, 1971-in a sawi dan ringawta ramsi a siam avanga lo intan a ni a. Ramri hmun hrang hrangah buaina leh tharum thawhna thleng fo mah se, July ni 26, 2021 a Vairengte dai-a Mizoram leh Assam Police an inkah ang em kha a la thleng ngai lo. Khami atang khan state inthenawm pahnihte chuan ramri chingfel turin ngawrh zawkin inbiakna an buatsaih chho ta a. Official-te vawi tam tak an inbiak bakah minister-te an inbe tawh a. Chief Minister hlui Pu Zoramthanga leh Assam CM Himanta Biswa Sarma te pawh kha vawi 2 Delhi-a an inbiak bakah Chief Minister thar Pu Lalduhoma leh Assam CM te hi an lo inbe tawh bawk a ni. (Akashvani Aizawl)