Mizoram Lokayukta-in tul a tih hun huna CBI a hman theih nan consent pe turin ngen
02 Sept 2024: Mizoram Pradesh Congress Committee (MPCC) Sr. Vice President Pu Lalnunmawia Chuaungo chuan ZPM sorkar chu CBI hnena general consent pek an ngam lo a nih pawhin, Mizoram Lokayukta-in state sorkar phalna la kher lo va tul a tih hun huna CBI a hman theih nan consent pe turin an ngen tih a sawi.
MPCC Vigilance Cell-te chuan vawiin khan Aizawl Press Club-ah thuthar thehdarhtute kawmin he hunah hian Pu Lalnunmawia Chuaungo chuan Chief Minister-in CBI hnena general consent pek chungchanga December 14, 2023 a Assemby Sessiona a sawi, general consent an pe dawn a, engmah phalna an dil a ngai dawn lo a tih dungzuia CBI hnena general consent, December 28, 2023 a an pek chu sut lehin July 1, 2024 khan consent thar an pe a, chu consent tharah chuan Mizoram sorkar hnuaia thawk, Chief Minister, Minister leh sorkar hnathawk dangte CBI-in a chhui theihna chu hnuk letin, a mal mala state sorkar phalna ziaka lak phawt tura tih a nih thu a sawi.
Chief Minister-in August 21, 2024 a a thusawi, a hmingah chuan general consent a la ni reng a, amaherawh chu State employee a huap ta lo tih leh chu chu an niin huap rawh se an ti thei lo va, tupawh sorkar se chutiang bak chu an pe thei lo a tih chu thudik a nih loh thu MPCC Vigilance Cell chuan sawiin, CBI hnena general consent pek chu Delhi Special Police Establishment Act, 1946 section 6 hnuaiah State sorkar thuneihna liau liau a ni a, eng dan dang hnuaiah mah khapna engmah a awm lo tih an sawi bawk a ni. (DD)
