Mizoram State Super Speciality Cancer & Research Centre din tum a ni

30 July 2025: Vawiin khan Chief Minister Pu Lalduhoma hovin CM Conference Hall-ah Japan International Cooperation Agency (JICA) sum hmanga sak tur Mizoram State Super Specialty Cancer & Research Centre chungchang sawiho a ni.

Mizoram hi India rama cancer hmuh chhuah tamna ber (highest incidence) a ni a, mihring nuai khat zelah mi 189.7 ten an vei thar thin. India rama cancer langsar pangate indawt dan chu Hnute, Chawkawng, Cervix, Chuap leh Esophagas a ni a, a hmasa pathumte hi a dapchhuahna (screening) tur sum central fund a awm a. Mizorama cancer langsar pangate indawt dan erawh chu Esophagus, Pumpui, Chuap, Hnute leh Cervix te an ni a, Central screening fund hman theih lohna pathumah cancer vei an tam bik thung a ni.

Mizoram State Super Speciality Cancer & Research Centre din hi a tulin sawrkar chuan a hria a. Zemabawk, tuna cancer hospital ram chu tinzawn a ni.

A sakna tur sum hi JICA loan beisei niin, Rs Vbch 700 senga din tum a ni a, chung zinga Rs Vbch 560 chu loan puk tur a ni. DPR hi Public Health Foundation India ten an siam a, kum 2023 February thlaah khan Loan Agreement hi Government of India leh JICA lam ten an ziak a. Loan interest rate hi 1.5% a ni a, kum 2033 atanga rulh tan tur a ni ang.

Ruahman danah chuan he Centre-ah hian cancer hospital building, nuclear medicine block leh staff quarters te sak an ni ang a. Equipment lamah hian PET scan/SPECT Scan, MRI 1.5 Tesla, CT Scan 128 Slices, PACS, RT-PCR/NGS te leh a dangte a awm ang. (DIPR)