18 June 2025: Vawiin khan Pi Lalrinpuii, Minister, Health & Family Welfare, leh Chairman, Mizoram State Aids Control Society (MSACS) ni bawk kaihhruaiin MSACS Governing Body chu Secretariat Conference Hall, MINECO ah an thukhawm a. Pu H. Lalengmawia, Secretary, Health & Family Welfare, Dr. Jane Rinzuali Ralte, Project Director, MSACS leh Governing Body member-te an tel a ni.
Health Minister Pi Lalrinpuii chuan Mizorama mihring awm zat atanga chhutin (prevelance) HIV vei mi 2.73% kan awm mek a, India ram puma a sang ber kan ni chu veiawm a tih thu sawiin HIV do zel turin chak zawka hma lak a tul thu a sawi a. Pu H. Lalengmawia chuan HIV veite chu ‘The HIV and AIDS (Prevention and Control) Act, 2017’ chuan hna laknaa induhsak lohna (discrimination) lakah a veng a ni tih tarlangin, inthlahrung lova hna dil tur an nih thu a sawi.
Project Director Dr. Jane Rinzuali Ralte tarlan danin April 2024 – March 2025 chhung khan Mizorama ART Centre 14 ah HIV vei (People living with HIV) mi 2069 inziaklut thar an awm a, ART dawngte zingah midang hnena kaichhawng thei lo tur (viral suppression) mi 97.7% an awm bawk. Kum 5 kal ta vel atang khan Mizoram ah HIV vei thar (new case) an tlem tual tual thu tarlan a ni. HIV dona kawngah nikum khan TBCC ah HIV testing campaign-te, Treatment Literacy Campaign-te, district-tin ah Intensive IEC Campaign leh HIV/AIDS avanga nunna chante hriatrengna ‘Candle Light Vigil’-te neih a ni a. Mizoram State Blood Transfusion Council chu Excellence in Blood Donation 2023-24 lawmman dawngin North-Eastern states te zinga titha ber a nih thu a sawi bawk.
He hunah hian MSACS-a contract a lakte hnathawh dan enho a ni a, MSACS Governing Body member thar ruat dan tur te, Annual Action Plan 2025-26 leh State Budget-a HIV dona tura sum hman tur dah a tul thute sawiho a ni. (DIPR)
